Россия ҳарбий-ҳаво кучлари 10 июнь куни Суриядаги жангарилар марказларига серияли ҳужум амалга оширган. Бу ҳақда Сурия ҳукумати хабарига асосланиб, Al-Arabiya нашри маълум қилди.
Манбада айтилишича, ҳужум асосан Суриянинг Ҳомс ва Дайр аз-Зор шаҳарларида ташкил этилган. Ушбу шаҳарлардаги исёнчилар ҳарбий нуқталарига кетма-кет 6 та ҳужум уюштирилган.
Россиянинг Сурия бўйича яраштириш маркази ҳужумни тасдиқлаган. Дамашқ билан ўзаро мулоқот алмашинуви асосида белгиланган нуқталар нишонга олингани хабар қилинган.
Россия асосан босим остида Сурия шарқидаги Ал-Танф вилоятидан чекинган жангарилар истеҳкомларни ўққа тутган. Уларнинг марказий ҳудудларга кириб келиши олди олинган.
“Сўнгги 24 соат ичида Россия Аэрокосмик кучлари Ал-Танф вилоятидан чиқиб кетган ва бориш қийин бўлган ҳудудларда яширинган жангариларнинг аниқланган базаларига олтита зарба берди”, — дейилган Россия томони эълон қилган баёнотда.
Маълумот ўрнида, Суриянинг Ал-Танф вилоятида Америка Қўшма Штатларининг ҳарбий базаси жойлашган. Сўнгги ҳафтада ушбу базадан юборилган кучлар қуролли ҳужум тайёрлашда гумонланган гуруҳларни вилоят ҳудудидан ҳайдаб чиқарган.
Изоҳ (0)