Тайван ҳарбийлари 9 июнь куни Тайпей бандаргоҳига кириб келган Хитой денгиз кучлари собиқ капитанини ҳибсга олган. Бу ҳақда Тайван ҳукумати манбаларига таяниб, Reuters нашри хабар берди.
Ҳарбийлар собиқ капитанни Тайпей бандаргоҳига ноқонуний равишда кирганликда айблаб, ҳибсга олган. Ҳибсга олинган шахс орол мудофааси тўғрисида маълумот тўплашда ҳам айбланмоқда.
Тайван қирғоқ қўриқлаш хизмати олдиндан ўзида бўлган маълумот асосида денгиз бўйидаги Тамсуи ҳудудида гумонланувчини ҳибсга олгани айтилган. Хитой вакили ушбу ҳудуддаги дарё орқали Тайван марказига сузиб боришни режа қилган.
Ҳозирда ҳибсдаги собиқ капитан сўроқ қилинаётгани маълум қилинган. Унга тегишли тезюрар қайиқдан шубҳали буюмлар топилмаган.
Сўнгги бир йил ичида бу каби ҳолат Тайванда 18 бор рўй берган. Тайпей ҳарбийлари оролга рухсатсиз яқинлашган кемаларни огоҳлантирмасдан тўхтатган ва ҳибсга олган.
Хитойнинг Тайван ишлари бўйича идораси ҳам, мудофаа вазирлиги ҳам ҳодиса юзасидан изоҳ бермаган. Тайван мудофаа вазири Веллингтон Ку журналистлар билан суҳбатда капитаннинг оролга ноқонуний кириб келиши Хитойнинг оролга қарши “кулранг зона” тактикасининг яна бир намунаси бўлиши мумкинлигини айтган.
Маълумот ўрнида, жорий йилнинг март ойида икки нафар тайванлик балиқчи Тайван назоратидаги Кинмен ороллари яқинида адашиб Хитой сув ҳудудига кирган эди. Собиқ армия офицери бўлган балиқчи маҳаллий ҳарбийлар томонидан ҳибсга олинган. Унинг ҳамроҳи эса қўйиб юборилган.
Изоҳ (0)