“Украина Фаластинни ҳам тан олади, Исроилни тўхтатиш учун қўлидан келганини қилади” — Зеленский

Украина президенти Владимир Зеленский мамлакатнинг Ғазо секторидаги вазият бўйича позициясини холис баҳолашга чақирди. Президент Украина Исроилни ҳам, Фаластинни ҳам тан олишини таъкидлади. Бу ҳақда у “Диалог – Шангри Ла” анжуманида маълум қилди.

Зеленский Яқин Шарқдаги можарога барҳам беришда Украина қўлидан келган ҳамма нарсани қилиши, мамлакат халқаро ҳуқуқ ва БМТ низомини ҳурмат қилишини таъкидлади.

“Украина, агар ҲАМАС жангчилари Исроилнинг тинч аҳолисига ҳужум қилган бўлса, Исроил ўзини ҳимоя қилиш ҳуқуқига эга эканини айтган”, — деб тушунтирди сиёсатчи.

Украина президенти Исроил ҳарбийлари Ғазо секторига киргач ва гуманитар инқироз юзага келгач, Украина Ғазога гуманитар ёрдам кўрсатмоқчи бўлганини эслатди. Бундан ташқари, Украина минтақада халқаро ҳуқуқ нормаларини ҳурмат қилиш муҳимлигини билдирди.

“Украина ҳам Исроилни, ҳам Фаластинни давлат сифатида тан олади ва ушбу можаро якунланиши ҳамда тинч аҳоли жабр кўрмаслиги учун Исроилни тўхтатиш мақсадида қўлидан келган барча нарсани қилади”, — деди у.