Эроннинг собиқ президенти Маҳмуд Аҳмадинажод мамлакатда яқинда ўтказиладиган президентлик сайловларига номзодини қўйди. Бу ҳақда Эрон маҳаллий нашрларига таяниб, Anadolu нашри хабар берди.
Маълум қилинишича, собиқ президент номзодларни сайловга рўйхатга олишнинг сўнгги кунида халқ олдида кўриниш берган. Давлат телеканаллари ҳам Аҳмадинажоднинг бошқа номзодлар қаторида турганини кўрсатган.
Маҳмуд Аҳмадинажод 2005—2013 йиллар оралиғида кетма-кет икки маротаба Эрон президентлигига сайланган. 2013 йилдан кейинги муддатда эса сиёсий раҳбарлик лавозимларида ишламаган.
Собиқ президент 2017 ва 2021 йилги президентлик сайловларида юқори текширув органи бўлган Қўриқчилар кенгаши томонидан сайлов номзодлари рўйхатидан чиқариб юборилган. Бунинг оқибатида 2017 йилда Ҳасан Руҳоний, 2021 йилда эса Иброҳим Раисий президентлик пойгасида ютиб чиққан.
- Эроннинг сўнгги президенти Иброҳим Раисий 19 май куни Эрон шимоли-ғарбида авиаҳалокат оқибатида вафот этгач навбатдан ташқари президентлик сайловлари 28 июнь кунига белгиланган эди.
- Номзодлар тўлиқ рўйхати эса 11 июнь куни эълон қилиниши белгиланган.
Сайловга ўз номзодини қўйган Маҳмуд Аҳмадинажод мамлакат муаммоларини мавжуд имкониятлардан максимал даражада фойдаланиш орқали ҳал қилиш мумкинлигини айтган. Таҳлилчилар собиқ сиёсатчининг бу фикрини унинг президентлик режаларида ташқи сиёсий кескинликни камайтириш, иқтисодий барқарорликка интилиш мақсадлари борлиги билан изоҳлашган.
Аҳмадинажоднинг сўзларига кўра, у “халқ талаби билан” сайлов пойгасига қўшилган.
Фото: AP Photo
Аввалроқ Эронда собиқ депутат Зуҳра Илоҳиён навбатдан ташқари президентлик сайловларида номзод сифатида рўйхатга олинган биринчи аёл бўлгани ҳақида хабар берилганди.
Ҳозирча Эронда президентлик пойгасига кўплаб таниқли шахслар, жумладан, ядровий масалалар бўйича собиқ музокарачи Саид Жалилий, Теҳрон мери ва президентликка собиқ номзод Алиризо Заканий, парламентнинг собиқ спикери Али Ларижоний, собиқ бош банкир ва президентликка номзод Абдулносир Ҳимматий ҳамда Маданият вазири Муҳаммад Маҳди Исмоилийлар қўшилган.
- Эронда президент вазифасини бажарувчи Муҳаммад Мохбер сайловларда қатнашишдан бош тортган.
- Шу ҳафта бошида парламент спикери этиб сайланган Муҳаммад Бағэр Ғолибаф эса ўз режалари ҳақида аниқ маълумот тақдим этмаган.
Изоҳ (0)