Ижтимоий тармоқларда номаълум шахслар фуқарони ураётгани акс этган видео тарқалмоқда. Ҳолат юзасидан Тошкент шаҳри Ички ишлар бош бошқармаси маълумот берди.
Аниқланишича, 12 октябрь куни тахминан соат 21:00 да 2003 йилда туғилган Ж.Р., 2001 йилда туғилган Ш.А. ва 2005 йилда туғилган Р.А. Telegram-бот орқали гиёҳвандлик моддаларни тарқатиш билан шуғулланган, 2003 йилда туғилган А.Б. билан Миробод туманида учрашув белгилаган. Шундан сўнг уни Бўстонлиқ туманига олиб бориб, уриб, тан жароҳати етказган ва устига «зелёнка» моддасини сепган.
Мазкур ҳолат юзасидан Миробод тумани ИИО ФМБ тергов бўлими томонидан Жиноят кодексининг 137-моддаси 2-қисми (одам ўғирлаш) ва 105-моддаси 2-қисми (қасддан баданга ўртача оғир шикаст етказиш) билан жиноят иши қўзғатилган. Гумонланувчиларга нисбатан қамоққа олиш эҳтиёт чораси қўлланган.
Тергов жараёнида Ж.Р., Ш.А. ва Р.А. шунга ўхшаш бошқа бир қанча жиноятларни содир этишга алоқадорлиги аниқланган. Тергов давом этмоқда.
Изоҳ (0)