Ўзбекистоннинг давлат қарзи ўтган йил давомида 5,7 миллиард долларга кўпайиб, 34,9 миллиард долларга етди. Бу ҳақда Иқтисодиёт ва молия вазирлиги ҳисоботида сўз боради.
Қайд этилишича, давлат ташқи қарзи 2023 йилда 3,73 миллиардга ошиб, 29,64 миллиард долларни ташкил этган (ЯИМнинг 32,6 фоизи). Бу маблағнинг 23,91 миллиард доллари ҳукумат номидан жалб қилинган, 5,72 миллиард доллари эса Ўзбекистон томонидан кафолатланган.
Давлат ички қарзи 1,97 миллиард долларга ошиб, 5,29 миллиард долларни ташкил этган (ЯИМнинг 5,8 фоизи). Шундан 1,78 миллиард доллар (21,9 триллион сўм) давлат қимматли қоғозлари, 3,51 миллиард доллари давлат томонидан кафолатланган ички қарздир.
Давлат қарзининг мамлакат ЯИМига нисбати 2022 йил охиридаги 36,4 фоиздан 2023 йил охирида 38,4 фоизгача (35,7 фоиз режалаштирилган эди) ошган. Давлат қарзи 2024 йилда ялпи ички маҳсулотга (ЯИМ) нисбатан 37 фоиз атрофида бўлиши кутилган эди.
Таққослаш учун: 2017 йилда давлат қарзи 11,5 миллиард долларни ташкил этганди (олти йил ичида бу кўрсаткич 3 баравар ошди). Гап “хусусий қарз”ни ҳисобга олмаган ҳолда фақат давлат қарзи ҳақида кетмоқда.
Иқтисодиёт ва молия вазирлиги тақдим этган 2024–2026 йилларга мўлжалланган бюджетномада келтирилган дастлабки таҳлилларда макроиқтисодий ҳамда фискал кўрсаткичлар барқарорлиги таъминланса, давлат қарзининг ЯИМга нисбати 2024 йилда 37 фоиз, 2025 йилда 37,4 фоиз, 2026 йилда 37,9 фоиз атрофида бўлиши прогноз қилинаётгани акс этган.
Изоҳ (0)