Дунё бўйлаб 400 миллиондан ортиқ болалар уруш ёки қуролли тўқнашувлар шароитида ўсиб улғаймоқда. Бу ҳақда SOS Болалар қишлоқлари (SOS-Kinderdörfer) халқаро хайрия ташкилоти маълум қилди.
Дунёда урушлар сони юқори даражага етди. Ҳарбий можаролар пайтида болалар ва ўсмирлар кўплаб хавф-хатарларга дучор бўлмоқда, — дейилади ташкилотнинг Халқаро болаларни ҳимоя қилиш куни муносабати билан эълон қилинган пресс-релизида.
Ташкилот матбуот котиби Борис Брейерга кўра, уруш ва қочқинлик барча жабрланганлар учун вазият устидан жиддий назорат йўқотилишини англатади.
Аммо болалар, айниқса, ҳимоясиз. Биз уларни ҳимоя қилиш учун қўлимиздан келганини қилишимиз керак, — дейди у.
Пресс-релизда БМТ маълумотларига иқтибос келтирган ҳолда, 2005 йилдан 2022 йилгача ҳарбий тўқнашувлар пайтида камида 315 минг нафар болалар ҳуқуқлари оммавий равишда бузилиши содир этилгани айтилган. Ташкилот, шунингдек, уруш ва қочқинлик болалар ва ўсмирларнинг ҳаётига хавф туғдирувчи оқибатларга олиб келиши, уларнинг бутун ҳаётига таъсир қилиши мумкинлигини таъкидлаган.
Хабарларга кўра, болалар ҳалок бўлган ёки оғир жароҳатланган, ота-онаси ёки васийларидан айрилган, уй-жойларини йўқотган ва қочишга мажбур бўлган. Озиқ-овқат танқислиги туфайли улар тўйиб овқатланмайди. Болалар, шунингдек, соғлиқни сақлаш ва таълим олиш имкониятига эга эмас. Улар можароларда ўғирланиши ёки урушга жалб қилиниши мумкин. Болалар ва ўсмирларнинг психологик фаровонлиги уларнинг тажрибалари ва уруш жароҳатлари туфайли қисқа ва узоқ муддатда жиддий равишда бузилиши мумкин.
Изоҳ (0)