Словения ташқи ишлар вазири Таня Фаён Рафаҳдаги ҳарбий ҳужум давом этса, Исроилга қарши санкциялар жорий этиш тарафдори. Бу ҳақда Словения ташқи ишлар вазирлигининг пресс-релизида айтилади.
“Мен кеча тунда Исроилнинг фаластинликларга қарши уюштирган ҳужумини кескин қоралайман, бу ҳужумда кўплаб болалар ҳалок бўлди. Агар халқаро гуманитар ҳуқуқ ва Халқаро суд қарорлари бузилиши давом этса, Европа Иттифоқи биргаликда ва қатъий жавоб бериши керак, жумладан, санкциялар жорий этиши керак”, — деди Фаён.
27 майга ўтар кечаси Исроил Рафаҳ шаҳрига ҳужум уюштирди, натижада Тал ал-Султон ҳудудидаги, Бирлашган Миллатлар Ташкилотининг Фаластинлик қочқинларга ёрдам кўрсатиш ва ишлаш агентлиги омбори ёнида лагерга камида саккизта ракета келиб тушди.
Фаластиннинг WAFA агентлиги тақдим этган сўнгги маълумотларга кўра, ҳужум натижасида камида 40 киши ҳалок бўлган, қурбонларнинг аксарияти аёллар ва болалардир.
Халқаро суд 24 май куни Жанубий Африканинг даъвоси бўйича қарор чиқарди, унга кўра, Исроил Рафаҳдаги ҳарбий ҳужумини ва шаҳар аҳолисига салбий таъсир кўрсатиши мумкин бўлган бошқа ҳаракатларни тўхтатиши керак. Суд, шунингдек, Исроилга Фаластин аҳолисига ёрдам кўрсатиш учун Рафаҳ ўтиш жойини очиқ сақлашни буюрди.
Изоҳ (0)