Ҳозирда Мюнхеннинг “Бавария” клубини бошқараётган германиялик мутахассис Томас Тухель Лондоннинг “Челси” клуби бош мураббийи лавозимига қайтиши мумкин. Бу ҳақда журналист Флориан Плеттенберг хабар бермоқда.
Манба берган хабарга кўра, мавсум якунида Мюнхен клубини тарк этадиган Тухель, агар раҳбарият трансфер бозорида мураббийга тўлиқ ишонч билдирса, АПЛга қайтишга ва “Челси”ни бошқаришга тайёр. Немис мутахассиси Тодд Боулининг лойиҳасига қайтиш ғоясидан илҳомланган ва у “аристократлар” бошқарувидаги биринчи миссиясини охирига етказиб қўйишни хоҳлайди.
Эслатиб ўтамиз, 21 май куни “Челси” Маурисио Почеттинони истеъфога чиқарганини эълон қилган эди. Аргентиналик мутахассис 2023 йилнинг ёзида “Челси” бош мураббийи этиб тайинланганди. Бу даврда унинг қўл остида “Челси” барча турнирларда 51 учрашув ўтказиб, 27 марта ғалаба қозонган. Ўйинларнинг 10 тасида дуранг ўйнаган ва 14 марта мағлубиятга учраган. Англия Премьер Лигасининг жорий мавсуми якунига кўра, “Челси” 63 очко жамғариб, олтинчи ўринни эгаллади.
Томас Тухель “Челси”да 2021 йилнинг январидан 2022 йилнинг сентябригача ишлаган. Клуб немис мураббийи билан биргаликда Чемпионлар Лигаси, УЕФА Суперкубоги ва 2021 йилги клублар ўртасидаги жаҳон чемпионатида ғолиб чиқди.
Изоҳ (0)