Тухель “Баварияни” тарк этади. Бош мураббий клуб билан келишувга эришолмади 

Томас Тухель “Бавария” бош мураббийлигида қолмайдиган бўлди. 

Аввалроқ мураббий ушбу чемпионат якунланганидан кейин “Бавария”ни тарк этишини айтганди. ОАВда эса Тухель кейинги мавсумда ҳам клубда қолиши мумкинлиги ҳақида хабарлар тарқалди.

Томас Тухель “Бавария”нинг Бундеслигадаги “Хоффенхайм”га қарши мавсумдаги сўнгги ўйини олдидан матбуот анжуманида бу ҳақда маълумот берди.

“Бу менинг клубдаги охирги матбуот анжуманим. Клуб билан музокаралар олиб борилди, бироқ келишувга эриша олмадик. Шунинг учун февраль ойида эълон қилинган дастлабки қарор ўз кучида қолади”, — дея изоҳлайди Тухель.

Жорий мавсумда мюнхенликлар бирорта соврин ютмади. Айни дамда Бундеслига турнир жадвалида иккинчи ўринни эгаллаб турибди. Биринчи ўриндаги “Байер” муддатидан олдин чемпионликни қўлга киритди. Тухель немис клубини 2023 йилдан бери бошқаради.

• Мураббий жамоани 60 ўйинда майдонга олиб тушган.
• Тухель бошчилигидаги клуб ўйинларнинг 37 тасида ғалаба қозонган. Ўйинларнинг 8 тасида дуранг қайд этиб, 15 бора мағлубият аламини тотиб кўрган.

Аввалроқ мюнхенликлар бош мураббийи фаолиятида ўзига хос натижани қайд этиб, учта турлича клуб билан мусобақа ярим финалига чиққан илк немис мураббийига айлангани ҳақида хабар берилганди.