Hozirda Myunxenning “Bavariya” klubini boshqarayotgan germaniyalik mutaxassis Tomas Tuxel Londonning “Chelsi” klubi bosh murabbiyi lavozimiga qaytishi mumkin. Bu haqda jurnalist Florian Plettenberg xabar bermoqda.
Manba bergan xabarga ko‘ra, mavsum yakunida Myunxen klubini tark etadigan Tuxel, agar rahbariyat transfer bozorida murabbiyga to‘liq ishonch bildirsa, APLga qaytishga va “Chelsi”ni boshqarishga tayyor. Nemis mutaxassisi Todd Boulining loyihasiga qaytish g‘oyasidan ilhomlangan va u “aristokratlar” boshqaruvidagi birinchi missiyasini oxiriga yetkazib qo‘yishni xohlaydi.
Eslatib o‘tamiz, 21-may kuni “Chelsi” Maurisio Pochettinoni iste’foga chiqarganini e’lon qilgan edi. Argentinalik mutaxassis 2023-yilning yozida “Chelsi” bosh murabbiyi etib tayinlangandi. Bu davrda uning qo‘l ostida “Chelsi” barcha turnirlarda 51 uchrashuv o‘tkazib, 27 marta g‘alaba qozongan. O‘yinlarning 10 tasida durang o‘ynagan va 14 marta mag‘lubiyatga uchragan. Angliya Premyer Ligasining joriy mavsumi yakuniga ko‘ra, “Chelsi” 63 ochko jamg‘arib, oltinchi o‘rinni egalladi.
Tomas Tuxel “Chelsi”da 2021-yilning yanvaridan 2022-yilning sentyabrigacha ishlagan. Klub nemis murabbiyi bilan birgalikda Chempionlar Ligasi, UEFA Superkubogi va 2021-yilgi klublar o‘rtasidagi jahon chempionatida g‘olib chiqdi.
Izoh (0)