Кўклам келиб, кунлар исиши билан инсонлар кўпроқ вақтни очиқ ҳавода ўтказишни хуш кўради. Баҳорги қуёш нури бошқа фаслларга нисбатан зарарлироқми? Унинг терига қандай хавфи бор? Шу каби саволларга шифокор-онколог, жарроҳ Роман Евстратов жавоб берди.
Қуёш нурининг фойдали томонлари
Қуёш нурлари инсон танасида D витамин ишлаб чиқарилиши учун асосий манба ҳисобланади, чунки витамин ультрабинафша нурлари таъсирида терида синтезланади. D витамини суяклар, тишлар ўсиши ҳамда иммунитет учун зарур элементдир.
Шунингдек, қуёш нури кайфиятни кўтарувчи серотонин гормонини ишлаб чиқаришда фаол иштирок этади ва инсонга кўтаринки руҳ бағишлайди. Кундуз куни танадаги серотонин етарли миқдорда бўлгани боис тунда уйқу сифати яхшиланади.
Бундан ташқари, терига қуёш нури таъсир қилганда қонда азот оксиди ҳосил бўлади. У қон босимини пасайтиришга ёрдам беради ва юрак хуружи, инсульт каби хавфли касалликларнинг олдини олади.
Қуёш нурининг зарарли томонлари
Узоқ вақт давомида қуёш остида қолиш терида енгил қизаришдан тортиб саратон каби хавфли тери муаммоларига олиб келиши мумкин. Тери саратони дунёдаги энг кенг тарқалган саратон турларидан бири бўлиб, ўз вақтида ва тўғри даволанмаса, ўлимга олиб келиши мумкин.
Қуёш нурларининг зарар ва фойдалари ҳақида гапирадиган бўлсам, ҳар қандай онколог берадиган тавсияни айтаман: очиқ қуёшда узоқ вақт қолиш ҳар қандай ёшдаги инсонга мумкин эмас, — деди шифокор-онколог, жарроҳ Роман Евстратов.
Даво ва чиниқиш мақсадида қуёш нурининг шифобахш хоссаси — қуёш ваннасидан фойдаланишда ҳам алоҳида эҳтиёткорлик талаб этилади. Қуёш ваннасида ультрабинафша ва ионли нурланиш хавфи юқоридир. Инсон ҳаёти давомида терида тўпланган барча қуёш нурланиши йиғилиб, вақт ўтиши билан турли тери касалликлари билан намоён бўлади. Булар ичида прогрессив бўлмаган хавфсиз ва катталашиб борувчи хавфли ўсимта касалликлари ҳам бор.
Табиий қуёш нури ҳам, солярий ҳам тери учун бирдек зарарлидир. Шунинг учун ташқарига чиқишдан ярим соат аввал қуёшдан ҳимояловчи воситалар, масалан SPF факторли крем суртиш тавсия этилади.
Баҳор фаслидаги қуёш хавфлими?
Баҳорги қуёш нури ёз фасли билан деярли бир хил таъсирга эга. Баҳорда қуёш нурининг фойдаси кўпроқ психологик жиҳатдан изоҳланади. Қиш фасли тугагач, чарақлаб турган қуёш ҳар қандай инсон кайфиятини кўтаради ва умумий эмоционал ҳолатини яхшилайди.
Изоҳ (0)