АҚШнинг Род-Айленд штатида жойлашган коллежларнинг бирида ўқувчилар таълим ташкилотида ишловчи қоровул ўз ватанига бориб келиши учун етарли маблағ йиғди. Бу ҳақда “Правила жизни” нашри хабар бермоқда.
Коллежда узоқ йиллардан бери қўриқлаш хизматида ишлаб келаётган Жеймс асли нигериялик бўлиб, 11 йил давомида оиласидан узоқда, мусофирликда яшаб келган. Бу ҳақда у февраль ойининг бошларида болалар билан кундалик суҳбат давомида айтиб ўтган.
Ҳолатдан хабар топган ўқувчилар Жеймсга ёрдам беришга қарор қилади ва керакли миқдорда маблағ тўплаш учун GoFundMe платформасида Жеймс ҳақида эълон жойлаштиради. Сайтда қоровул ҳафтасига тўрт кун тунги сменада ишлаши ва жуда олийжаноб инсон эканлиги айтиб ўтилди. Эълонни жойлаштирган Брендон Райхерт исмли ўқувчи Жеймс ҳақида кўплаб илиқ фикрлар қолдирди. Шунингдек, қўриқчи пул йиғими ҳақида умуман бехабар эканлиги таъкидлаб ўтилди.
GoFundMe сайтида эълон жойлаштирилгандан бир кун ўтиб ўқувчилар уч минг доллар йиғишга муваффақ бўлди. Тез орада Жеймснинг уйга сафари учун етарли маблағ тўпланди. Кейинчалик ташаббускор ўқувчилар ҳайратда қолган қоровулга пул узатаётган суратини эълон қилишди.
Ҳозирда йиғилган пул миқдори 20 минг доллардан ошган. Эълонга изоҳларда болалар ушбу йиғимга ҳисса қўшган барчага миннатдорчилик билдиришди ва эндиликда Жеймс оиласини кўриш учун тез-тез Нигерияга бориб туриш имконияти борлигини айтиб ўтишди.
Изоҳ (0)