Исроил ҳарбий разведкаси раҳбари 7 октябрь куни ҲАМАС етакчилигида Исроилга қарши уюштирилган ҳужумнинг олдини ололмаганликда айбланиши ортидан истеъфога чиқди. Бу ҳақда Reuters нашри хабар берди.
Ҳарбий разведка раҳбари, генерал-майор Аҳарон Ҳалива 22 апрель куни истеъфога чиқишини маълум қилган. Олдинроқ у мамлакат чегара мудофаасини ташкил этишдаги камчиликларини ўз зиммасига олиб, халқдан узр сўраган эди.
Генерал-майор Аҳарон Ҳалива билан биргаликда яна бир қанча йирик ҳарбий мутасаддилар Исроил тарихидаги энг ҳалокатли ҳужумни олдиндан кўра олмагани ва унга қарши тура олмагани учун айбланган. Тегишли ташкилотларга уларнинг фаолиятини текшириш топширилган.
“Менинг қўмондонлигим остидаги разведка бўлинмаси бизга ишониб топширилган вазифани бажара олмади. Шундан бери мен ўша қора кун ҳақидаги юкни ўзим билан олиб юрибман”, — деган ҳарбий разведка раҳбари истеъфоси олдидан ёзган мактубида.
Манбада айтилишича, 7 октябрдаги ҳужум пайтида ҲАМАС аскарлари Ғазо атрофидаги юқори технологияли хавфсизлик тўсиқларини бузиб ўтиб, Исроил кучларини ҳайратда қолдирган. Тўсиқдан ўтилгач, Исроил аҳоли пунктлари жуда тез эгаллана бошлаган.
Ҳужумда 1200 нафарга яқин исроиллик ва хорижлик ҳалок бўлган. Уларнинг аксарияти тинч аҳоли вакиллари бўлгани айтилган. 250 нафарга яқин исроиллик асирга олинган. Ҳозирда улардан 133 нафари гаровда қолмоқда.
Дастлаб Исроил қуролли кучлари бошлиғи, генерал-лейтенант Герзи Ҳалеви ва ички разведка агентлиги раҳбари Шин Бет ҳужум учун масъулиятни ўз зиммасига олган. Аммо мамлакат уруш ҳолатида бўлгани боис Тель-Авив уларни вазифасидан олишга шошилмаган.
Изоҳ (0)