2023 йилда Украина давлат бюджетидан ҳарбий харажатлар учун 1,844 триллион гривна (49,14 миллиард доллар) ажратди, деб хабар берди Рақамли ривожланиш вазирлиги. Бу барча харажатларнинг 60,8 фоизини ташкил этади.
“Хавфсизлик ва мудофаа давлат бюджетининг мутлақ устувор ва энг йирик банди бўлиб қолмоқда. 2023 йилда хавфсизлик ва мудофаа соҳасидаги жами давлат бюджети жамғармаси 1,844 триллион гривнани ёки жамғарма харажатлари умумий ҳажмининг 60,8 фоизини ташкил этди”, — дейилади вазирлик хабарида.
Қайд этилишича, пуллар ҳарбий соҳа ва полицияни молиявий қўллаб-қувватлаш, техника, ўқ-дорилар, қурол-яроғ, шахсий ҳимоя воситалари ва озиқ-овқат сотиб олишга сарфланган. Шунингдек, пулнинг бир қисми Украина хавфсизлик кучларининг тиббий суғуртаси ва ихтисослаштирилган муассасалар ишини таъминлаш учун ажратилган.
Украинанинг 2023 йилги бюджети тақчиллиги 54,75 миллиард долларни ташкил этди. Маълум қилинишича, камомаднинг катта қисми Ғарб ёрдами эвазига қопланган. 2024 йилги бюджетда Украина хавфсизлик ва мудофаа секторига 1,69 триллион гривна сарфлашни режалаштирмоқда (26,5 млрд доллар), бу мамлакат ялпи ички маҳсулотининг 22,1 фоизини ташкил этади.
Европа Иттифоқи ва АҚШ Украинага янги молиявий ёрдам ажратиш борасида келиша олмаяпти. Европа Иттифоқида Венгрия Украинага 50 миллиард евро ажратишга вето қўйди. АҚШда Киевга 250 миллион доллар миқдорида ёрдам кўрсатиш тўғрисидаги қонун лойиҳаси Конгресс томонидан қабул қилинмаяпти.
Изоҳ (0)