Исроил бош вазири Биньямин Нетаньяхунинг рафиқаси Сара ҲАМАС томонидан гаровга олинган исроилликларни озод қилиш мақсадида Қатар амирининг онаси Моза бинт Насер Ал-Мисснедга мактуб йўллади. Бу ҳақда The Jerusalem Post хабар берди.
“Мен жуда долзарб ва муҳим масала — ҲАМАС томонидан ўғирлаб кетилган ва Ғазода ушлаб турилган исроилликларнинг оғир аҳволи юзасидан мурожаат қилмоқчиман. Аёлдан аёлга гаровга олинганлар орасида ақл бовар қилмайдиган азоб-уқубатларни бошдан кечиришга мажбур бўлган 19 аёл борлигини етказиш муҳимдир. Жинсий зўравонлик ва зўрлаш ҳақидаги хабарлар даҳшатли ва аёлларга қарши бундай ҳаракатларни эътиборсиз қолдириб бўлмайди.
Сизни Рамазон ойи руҳида исроиллик гаровга олинганларни озод қилиш учун ўз таъсирингиздан фойдаланишга чақираман. Аёллар қадр-қиммати ва хавфсизлиги хавф остида қолганда биз жим тура олмаймиз ёки орқада туролмаймиз”, — деган у.
Нетаньяхунинг мактуби сўнгги ҳафталарда Исроил ва ҲАМАС ўртасида ўт очишни тўхтатиш бўйича янги саъй-ҳаракатлар, Қатар муҳим воситачи сифатида ҳаракат қилаётган бир пайтга тўғри келди.
Аввалроқ БМТ экспертлари Ғазода аёл ва қизлар Исроил ҳарбийлари томонидан зўрланган, сабабсиз қатл қилинганини маълум қилганди. Фаластинлик аёллар Ғазода оила аъзолари, жумладан, фарзандлари билан бирга асоссиз қатл этилган ҳолатлар бўлган.
Мутахассислар 7 октябрдан бери Ғазода юзлаб фаластинлик аёллар ва қизлар, жумладан, ҳуқуқ ҳимоячилари, журналистлар сабабсиз ҳибсга олинганидан жиддий хавотир билдирган. Уларнинг кўпчилиги ғайриинсоний ва қадр-қимматни камситувчи муносабатга дучор бўлган, аёллар гигиеник воситалар, озиқ-овқат ва дори-дармонлар билан таъминланмаган. Камида бир марта Ғазода қўлга олинган фаластинлик аёллар ёмғир ва совуқда, озиқ-овқатсиз қафасда сақланган.
Изоҳ (0)