ҲАМАС Ғазода ўт очишни тўхтатиш бўйича Америка таклифининг ўзгартирилган версиясини қабул қилди. Бу ҳақда Фаластин гуруҳининг юқори мартабали расмийсига таяниб, Al Arabiya хабар берди.
ҲАМАС вакиллари яқин кунларда Миср пойтахти Қоҳирага бориб, келишувнинг якуний тафсилотлари ва уни амалга оширилишини муҳокама қилиши кутилмоқда. Оқ уй ҲАМАС жангчиларини гаровга олинган аёллар, қариялар ва ярадорларни озод қилишга ҳамда Исроил билан жангларда вақтинчалик сулҳга рози бўлишга чақирган. Мазкур сулҳ кейинчалик узайиши мумкинлиги кутилмоқда.
Агар ҲАМАС аёллар, ярадорлар ва қарияларни озод қилса, олти ҳафта давомида ўт очишни тўхтатиш келишуви стол устида турибди, — деган Оқ уйнинг миллий хавфсизлик бўйича маслаҳатчиси Жейк Салливан.
Сўнгги таклифга кўра, Исроил фаластинлик маҳбусларни ҲАМАС томонидан гаровга олинганлар сонига 10га бир нисбатда озод қилади. Келишув Ғазодан кўчирилган фаластинликларнинг босқичма-босқич қайтишини ҳам назарда тутади.
ҲАМАС сиёсий бюроси аъзоси Муҳаммад Наззал музокаралар давом этаётгани, аммо “қотиб қолганини” айтиб, Исроил вақтинчалик оташкесим таклиф қилганини, буни ҲАМАС қабул қилмаслигини айтди.
Исроил қўшинларининг Ғазода мавжудлиги кўчирилганларнинг қайтишига тўсқинлик қилмоқда, — деди у Al Arabiya’га.
Наззалнинг айтишича, ҲАМАС ҳеч қандай шарт ва чекловларсиз Ғазога гуманитар ёрдам олиб кириш талабида қатъий қолади.
Изоҳ (0)