Россияда 15 март куни президентлик сайлови бошланди, амалдаги президент Владимир Путинга уч киши рақиблик қилмоқда. Бу ҳақда BBC хабар берди.
Овоз бериш уч кун давом этади ва ҳудудларнинг учдан бирида электрон шаклда ўтказилади. Украинага бостириб киришни танқид қилиб, урушни тугатиш тарафдори бўлган журналист Екатерина Дунцова, “Фуқаролик ташаббуси” партиясидан сиёсатчи Борис Надеждин номзоди рад этилганди.
Ушбу сайловларда уч номзодга Путин билан “рақобатлашиш”га рухсат берилган:
- Россия Коммунистик партиясидан депутат Николай Харитонов;
- Россия Либерал демократик партиясидан Леонид Слуцкий;
- “Янги одамлар”дан дума вице-спикери Владислав Даванков.
Мазкур номзодлардан ҳеч бири Украинадаги урушни қораламайди ёки Путинни бевосита танқид қилмайди. Сайловда овоз беришнинг ягона интригаси номзодлардан қайси бири қандай натижа билан иккинчи ўринни эгаллашидир.
Владимир Путин бешинчи муддатга президентликка номзод сифатида кўрсатилишини 8 декабрь куни маълум қилганди, у 18 декабрь куни Марказий сайлов комиссиясига ҳужжатларни топширганди.
Номзодлар ҳақида қисқача
Владимир Путин бешинчи муддатга президентликка номзод сифатида қатнашмоқда. Икки йил олдин у Украинага “махсус ҳарбий операция”, яъни уруш бошлашни буюрганди. 2023 йилда Халқаро жиноий суд Путинни украиналик болаларнинг депортацияси билан боғлиқ ҳолда ҳибсга олиш учун ордер берган. Ўзининг аввалги муддати давомида у Конституцияга ўзгартириш киритиб, ўзининг президентлик муддатини ноллаштирган.
Эҳтимол, сайловда 80 фоизга яқин овоз билан ғалаба қозонади. Амалдаги қонунлар Путинга 2036 йилгача ҳокимиятда қолишига имкон беради.
Николай Харитонов
Россия Коммунистик партиясининг 75 ёшли фахрийси, 20 йилдан ортиқ тажрибага эга Давлат Думаси депутати. Харитоновнинг сайловолди ташвиқотининг ягона ҳайратланарли томони унинг узоқ йиллик партия раҳбари Геннадий Зюганов ўрнига сайланиш учун кўрсатилиши бўлди.
Интервьюда у журналистларга нима учун Владимир Путиндан яхшироқ эканини айта олмаслигини айтди ва Россия президентини танқид қилмасликка ваъда берди. 2022 йилда у Ғарб санкцияларига учраган, Украинанинг “деназификациясини” қўллаб-қувватлаган.
Леонид Слуцкий
Россия Либерал демократик партиясидан раҳбар этиб Владимир Жириновский ўрнини эгаллади. Сўнгги саккиз йил давомида у Думанинг Халқаро ишлар бўйича қўмитасини бошқариб келган. У босиб олинган Қримга Европадан делегацияларнинг ташрифини уюштирган. Шунинг учун у 2014 йилда Ғарб санкцияларига учраган. Слуцкий Украинага бостириб киришни қўллаб-қувватлаган.
2018 йилда бир қанча журналистлар, жумладан, BBC мухбири уни жинсий зўравонликда айблаган. Номзоднинг бутун кампанияси марҳум Жириновскийнинг шахсига қаратилган.
Владислав Даванков
Янги партиянинг янги юзи. У Faberlic асосчиларидан бири. 2023 йилда Москва мерлигига сайловларда қатнашиб, 5 фоиздан сал кўпроқ овоз тўплаган. Украина билан урушда у “русча шартлар” асосида “тинчлик ва музокаралар” тарафдори бўлган.
Украина ҳудудларининг аннексия қилинишини ёқлаб овоз берган ва бунинг учун у халқаро санкциялар остида қолган. Сайловлар арафасида у Россия мухолифатининг бир қисми томонидан қўллаб-қувватланган. Даванков Кремль сиёсатига қарши чиққан россияликлар учун энг мақбул номзод деб кўрилади. Марҳум Алексей Навальний тарафдорлари бунга қўшилмаган.
Изоҳ (0)