21 февраль куни Буюк Британия россиялик мухолифатчи Алексей Навальний вафот этган “Қутб бўриси” колонияси раҳбариятининг олти аъзосини санкциялар рўйхатига киритди. Бу ҳақда CNN хабар берди.
Хабарда айтилишича, “қора рўйхат”га тушган колония ходимларига Буюк Британияга кириш тақиқланган. Ушбу фуқароларга, шунингдек, Британияда ҳисоб рақами очиш ҳам чекланган.
Лондондаги ҳукумат эълон қилган рўйхатда колония бошлиғи, полковник Вадим Константинович Калинин, унинг ўринбосарлари Сергей Николаевич Коржов, Василий Александрович Видрин, Владимир Иванович Пилипчик, Александр Владимирович Голяков, Александр Валериевич Образцовлар бор.
“Жаноб Навальнийнинг аҳволи қамоқдаги уч йил давомида муттасил ёмонлашган. У тиббий муолажа ололмасликдан азият чеккан. Қамоқхонада -32 даража совуқ об-ҳаво шароитида яшашга мажбур бўлган”, — дейилади Буюк Британия Ташқи ишлар вазирлиги баёнотида.
Изоҳ (0)