Россиялик сиёсатчи, марҳум Алексей Навалнийнинг танасида тутқаноқдан ва билвосита юрак массажидан кўкариш излари аниқланган. Бу ҳақда “Новая газета Европа” манбаси хабар берди.
Хабарга кўра, марҳумнинг жасади ҳозирда Салехард туман клиник шифохонаси ўликхонасида. 17 февраль ҳолатига кўра, аутопсия (мурдани ёриб кўриш) ўтказилмаган, патологоанатомларга буни ўтказиш тақиқланган.
Тез ёрдам хизматидаги манбанинг айтишича, Навалнийнинг танасида ҳаёти давомида олган кўкаришлар топилган. Лекин калтаклашдан эмас, балки бошқа омиллар натижасида.
“Тез ёрдам хизматининг катта тажрибага эга ходими сифатида айтишим мумкинки, бундай жароҳатлар, уларни кўрганлар тасвирлаганидек, тутқаноқдан пайдо бўлади. Одам талвасага тушади, уни ушлаб туришга ҳаракат қилишади, аммо конвулсиялар (қисқа муддатли, мушакларнинг тез-тез спазм бўлиши) жуда кучли бўлиши мумкин, шу сабабдан кўкаришлар пайдо бўлади. Кўкрак қафасида ҳам кўкарган жойлар борлигини айтишди. Аммо бу билвосита юрак массажи билан боғлиқ ҳолда пайдо бўлади”, — дейди тез ёрдам ходими.
16 ёки 17 февраль кунлари ҳам аутопсия ўтказилмаган. Шунинг учун Россия расмийлари ўлимнинг аниқ сабабини ҳали эълон қилгани йўқ ва қариндошларига жасадни кўришга рухсат берилмаган.
Сиёсатчининг онаси Навалний сақланган колонияга келганида унга жасад Салехард шаҳрига олиб келингани тўғрисида маълумотнома берилган, дейди Навалний матбуот котиби Кира Ярмиш. Бироқ унинг сўзларига кўра, Салехард ўликхонасида жасад борлигини тасдиқлашмаган.
Шу билан бирга, Тергов қўмитаси сиёсатчи тарафдорларига жасад уларда борлиги ҳақида маълум қилган ва ўлим сабабини аниқлаш учун янги экспертизаларни тайинлаган. Ярмишнинг фикрича, жасад “изларини беркитиш” учун яширилган.
“Эндиликда улар Алексейни ўлдириш учун қандай усулдан фойдаланган бўлса, бу сафар ҳам худди шундай қилишга ҳаракат қилмоқда: улар изларини беркитиш учун унинг жасадини яширишади ва шунчаки уни қариндошларига беришмайди”, — дейди Навалнийнинг матбуот котиби.
Россия расмийлари телевидение орқали мухолифатчининг жасади қаердалигига изоҳ бермаган.
Алексей Навалний ўлими
Россиялик сиёсатчи, Путиннинг ашаддий танқидчиси Алексей Навалний 16 февраль куни колонияда вафот этди. Россия қамоқхона хизматига кўра, у “сайрдан кейин ўзини ёмон ҳис қилган ва ҳушини йўқотган”. Ўлимга дастлаб тромб ёрилгани сабаб бўлгани айтилган.
“Оммавий ахборот воситаларида ёзилаётган ва Жазони ижро этиш Федерал хизмати томонидан эълон қилинган хабарда Алексей Навалний тромб ёрилишидан вафот этгани айтилмоқда. Аммо буни ҳозирча тасдиқлаб бўлмайди, чунки бу касалликни аниқлаш учун аввал мурдани ёриб кўриш керак”, — деган Навалнийни даволаган шифокор Полупанов.
Ўз навбатида, Тергов қўмитаси терговчилар марҳумнинг жасадини текширмоқчи.
“Алексей Навалнийнинг жасади зудлик билан оиласига берилишини талаб қиламиз”, — дейди сиёсатчининг матбуот котиби.
Изоҳ (0)