Россия федерал жазони ижро этиш хизмати ходимлари 17 февралга ўтар кечаси Алексей Навальнийнинг жасадини колонияга унинг адвокат ва яқинлари келгунига қадар у ердан олиб кетган бўлиши мумкин. Бу ҳақда BBC хабар берди.
Журналистлар Харпедаги колониядан туман марказига борадиган ягона қуруқлик йўли бўлган Лабитнанги ва Салехард кесишмасидаги камералардан олинган видеоёзувларни ўрганди. Тасвирларда тўртта машинадан иборат кортеж, шу жумладан федерал жазони ижро этиш хизматига тегишли автомашина аниқланган.
Журналистлар воқеа 16 февралдан 17 февралга ўтар кечаси ярим тунда содир бўлганини инобатга олиб, Навальнийнинг жасади ИК-3 колониясидан айнан ниманидир яшириш учун Салехард томон олиб кетилганини тахмин қилмоқда.
Айни пайтда, тиббий экспертлари Россия ҳукумати Навальнийнинг жасадини ёришни қанча кечиктирса, унинг табиий сабабларга кўра вафот этгани эҳтимоли шунчалик кам бўлади, деган фикрда.
17 февраль куни Алексей Навальнийнинг оиласи Харпедаги колонияда вафот этган сиёсатчининг жасадини топиш учун уринишлари муваффақиятсиз якунланди. Марҳумнинг жасади дастлаб Лабитнангига олиб кетилган, бироқ 16 февраль куни кечқурун Салехард туман клиник шифохонасига етказилган.
Навальнийнинг онаси ва у жазони ўтаётган Харпедаги колонияга келган адвокат Салехард ўликхонасига жўнатилган. Аммо у ерда уларга Навальнийнинг жасади йўқлигини айтишган.
Россия Тергов қўмитаси эса сиёсатчининг ўлими сабабларини аниқлашда давом этишлари ва кейинги ҳафтадан терговни якунламасликларини айтмоқда. Салехард тез тиббий ёрдам станцияси ходимига кўра, Навальнийнинг танасида ҳаёт давомида олинган кўкаришлар топилган, аммо улар калтакланишдан эмас.
BBC билан суҳбатлашган икки йирик хорижий реаниматологнинг айтишича, мурдани ёриб кўрмасдан Навальнийнинг ўлим сабаблари ҳақида гапириш мумкин эмас.
“Фақат ўз вақтида ўтказилган аутопсия (мурдани ёриб кўриш) тўсатдан ўлим сабабларини аниқлаши мумкин, уни имкон қадар тезроқ, камида 24 соат ичида ўтказиш керак эди. Бу тўсатдан ўлим ҳолатларида амалга ошириладиган мунтазам қадамлар бўлиб, аутопсияни амалга ошириш учун биопсия ёки бошқа тестлар натижаларини кутишнинг ҳожати йўқ.
Агар ўлимга массив тромбоэмболия, ўткир коронар синдром, инфаркт ва бошқалар сабаб бўлганида, Россияда аллақачон бу ҳақда бонг уришарди. Расмийлар мурдани ёриб кўриб, жасадни оиласига топшириши фойдалироқ бўларди: гўёки бизнинг бунга ҳеч қандай алоқамиз йўқ маъносида. Менга бир нарса аниқки, жасад топширилмаяптими, демак, яширадиган нарса бор”, — дейди АҚШдаги Туфц тиббиёт марказининг анестезиология ва интенсив терапия бўлими мудири Константин Балонов.
Исроиллик таниқли реаниматолог Михаил Фремдерман марҳумнинг танасидаги кўкариш тутқаноқдан бўлиши мумкинлиги ҳақидаги хабарга муносабат билдирди.
“Бу саводсиз тиббий тахмин, биз аутопсияни кутишимиз керак”, — дейди у.
Балоновнинг сўзларига кўра, бир кун аввал Навальний гапирган ва ҳазиллашгани акс этган суддан олинган видеода у оғир хасталикка чалинган одамга ўхшамаган: унинг аҳволи, видеодан хулоса қилиш мумкинки, адекват эди.
“Одамлар камдан-кам ҳолларда тромбоэмболиядан ўлади. Агар у тўсатдан юрак тўхташига олиб келадиган бўлса, бу симптомсиз тарзда содир бўлиши эҳтимолдан йироқ эмас”.
Шифокор сўзларига кўра, ўткир коронар етишмовчиликдан тез-тез ўлим содир бўлади, аммо бу ташхис қўйиш учун 24 соат ичида аутопсия ўтказилиши керак. Балоновнинг фикрича, ташхиснинг иккала варианти (тромбоэмболия ва ўткир коронар етишмовчилик) эҳтимоли паст:
“Навальнийнинг жасадини аутопсия қилишни қанча кечиктиришса, унинг ўлимининг табиий сабаби шунчалик камроқ бўлади”.
Мутахассис сиёсатчи заҳарланишдан ўлгани эҳтимолини юқори деб ҳисоблайди, аммо батафсил аломатларсиз унинг заҳар таркибини тахмин қилиш мумкин эмас.
“Заҳарли модда организмда анча вақт сақланиб қолади, айниқса одам ўлган бўлса, лекин 2020 йилдан фарқли ўлароқ, энди Навальнийнинг қариндошлари тадқиқот учун унинг жасадини чет элга юбора олиши даргумон”, — дейди Балонов.
Алексей Навальний ўлими
Россиялик сиёсатчи, Путиннинг ашаддий танқидчиси Алексей Навальний 16 февраль куни колонияда вафот этди. Россия қамоқхона хизматига кўра, у “сайрдан кейин ўзини ёмон ҳис қилган ва ҳушини йўқотган”. Ўлимга дастлаб тромб ёрилгани сабаб бўлгани айтилган.
“Оммавий ахборот воситаларида ёзилаётган ва Жазони ижро этиш Федерал хизмати томонидан эълон қилинган хабарда Алексей Навальний тромб ёрилишидан вафот этгани айтилмоқда. Аммо буни ҳозирча тасдиқлаб бўлмайди, чунки бу касалликни аниқлаш учун аввал мурдани ёриб кўриш керак”, — деган Навальнийни даволаган шифокор Полупанов.
Ўз навбатида, Тергов қўмитаси терговчилар марҳумнинг жасадини текширмоқчи.
“Алексей Навальнийнинг жасади зудлик билан оиласига берилишини талаб қиламиз”, — дейди сиёсатчининг матбуот котиби.
Изоҳ (0)