“Биз ҲАМАСнинг аҳмоқона талабларидан бошқа ҳеч нарсага эришмадик” — Нетаньяху

Исроил АҚШ президенти Жо Байденнинг илтимосига биноан сулҳ музокаралари учун Қоҳирага музокарачиларни юборди, бироқ улар кейинги музокаралар учун қайтмаган. Бу ҳақда Исроил бош вазирининг баёнотига таяниб, Reuters хабар берди.

Миср ва Қатар воситачилигида Ғазода ўт очишни тўхтатишга эришиш ва ҲАМАС назорати остидаги ҳудудда гаровга олинган 100 дан ортиқ исроилликларни озод қилиш бўйича олиб борилган музокаралар ҳозирча натижа бермаган. Сешанба куни Қоҳирадаги самарасиз музокаралар якунланди. Шанба куни бўлиб ўтган матбуот анжумани чоғида нега исроиллик музокарачилар кейинги учрашувлар учун қайтиб келмагани ҳақидаги саволга Исроил бош вазири шундай жавоб берди: “Биз ҲАМАСдан аҳмоқона талаблардан бошқа ҳеч нарса эшитмадик”.

Унинг сўзларига кўра, бу талаблар орасида урушни тугатиш ва ҲАМАСни ўз ҳолича қолдириш ҳам бўлган. Шунингдек, Нетаньяху Қоҳирадаги Исроил вакиллари муҳокамаларни тинглагани, лекин ҳеч қандай ўзгариш бўлмаганини айтган.

Нетаньяху исроиллик музокарачилар қайтишлари учун ҳеч қандай сабаб йўқлигини эслатиб ўтган. Бош вазирга ҲАМАС билан келишувга эришишда босим ўтказиш учун минглаб исроилликлар Тель-Авивдаги ҳарбий қароргоҳ олдида тўпланди. 

Исроилга кўра, ҲАМАС ҳужумида 1200 га яқин исроиллик, асосан тинч аҳоли ҳалок бўлган. ҲАМАС жангчилари шунингдек, 253 нафар асирни гаровга олган, бироқ ноябрь ойида қисқа муддатли сулҳдан сўнг уларнинг 100 дан ортиғи қўйиб юборилган. Исроилнинг ҳаво ва қуруқликдаги ҳужуми шундан сўнг Ғазо секторининг катта қисмини вайрон қилган, Фаластин соғлиқни сақлаш идораларига кўра, 28 775 нафар фаластинлик, жумладан, асосан тинч аҳоли ҳалок бўлиб, Ғазонинг деярли 2 миллиондан ортиқ аҳолиси уйларини тарк этишга мажбур бўлган.

Нетаньяху Фаластин давлатининг бир томонлама тан олинишини терроризм учун мукофот дея таърифлади. Исроил раҳбарлигим остида Фаластин давлатининг бир томонлама тан олинишига қатъий қарши чиқишда давом этади. Келишувга фақат томонлар ўртасида ҳеч қандай шартларсиз тўғридан-тўғри музокаралар йўли билан эришиш мумкин, қўшимча қилди у.

ҲАМАС раҳбари Исмоил Ҳания Ғазо секторида ўт очишни тўхтатиш бўйича келишувга эришилмагани учун Исроилни айблади, дейилади гуруҳнинг шанба кунги баёнотида. Ҳаниянинг айтишича, ҲАМАС урушларни тўлиқ тўхтатиш, Исроилнинг Ғазо секторидан чиқиб кетиши, “ноҳақ қамални олиб ташлаш” ва Исроил қамоқхоналарида узоқ муддат қамоқ жазосини ўтаётган фаластинлик маҳбусларни озод қилинишидан бошқа ҳеч нарсага рози бўлмайди.