2023 йил 23 мартдаги президент фармони билан 2024 йил 1 январгача 36 турдаги озиқ-овқат маҳсулотларини Ўзбекистонга олиб киришда божхона божининг нол ставкаси қўлланилиши белгиланганди.
Хусусан, маҳсулотлар рўйхатида аҳолининг кундалик ратционида мавжуд сут маҳсулотлари, мевалар, дуккакли сабзавотлар, тайёр ёки консерваланган гўшт маҳсулотлари, макарон, таркибида какао бўлмаган қандолат маҳсулотлари, алкоголсиз ичимликлар, болалар кийимлари киритилган.
Статистика рақамларга кўра, 2022 йилда 1 273 та тадбиркорлик субъектлари томонидан Ўзбекистонга олиб кирилган 470 минг тонна шу турдаги товарлар учун 475,4 миллиард сўм божхона божи тўланган. Фармон қабул қилиниши натижасида 1 200 дан ортиқ тадбиркорлик субъектларининг 500 миллиард сўм пул маблағлари ўз ихтиёрларида қолиши прогноз қилинган.
Шу билан бирга, президентнинг 2022 йил 31 майдаги фармони билан айрим турдаги товарларга нисбатан жорий қилинган имтиёзларнинг амал қилиш муддат 2024 йил 1 январга қадар узайтирилганди. Яъни 23 турдаги товарлар хориждан олиб келинганда уларга нисбатан божхона божларининг нол ставкалари белгиланади. Бу рўйхат гўшт, балиқ, чой, турли ёғлар, ун, банан каби кунлик истеъмолдаги озиқ-овқат маҳсулотлари киритилган.
Таҳлилларга қараганда, мазкур фармон асосида 2022 йилда ва 2023 йилнинг январь–май ойларида 431 та тадбиркорлик субъектлари хориждан олиб келган 301,2 минг тонна товарлари учун божхона божидан 905,4 миллиард сўм имтиёзлар қўлланган.
2023 йил якунига етишига ҳам саноқли кунлар қолди. Келаси йил январдан юқоридаги 50 дан ортиқ турдаги импорт маҳсулотлар учун бож имтиёзлари бекор қилинса, нархлар кўтарилиш эҳтимоли юқори.
Изоҳ (0)