Давлат божхона қўмитаси ходими жиноий гуруҳ билан тил бириктириб, 145 миллиард сўмлик суғурталаш орқали давлат бюджетига тушиши керак бўлган маблағларни ўзлаштиришга уринганда қўлга олинган. Бу ҳақда Божхона қўмитаси раисининг биринчи ўринбосари Илҳом Мухторов АОКАда ўтказилган матбуот анжуманида маълум қилди.
Илҳом Мухторовнинг айтишича, пулларни ўзлаштиришда иштирок этган шахс Божхона қўмитасининг Тўловлар бошқармаси ходими бўлган.
“Божхона тўловларини бўлиб тўлаш йўналишида бир амалиёт бор. Бунда суғурта компанияларидан тақдим қилинган суғурта полиси асосида маълум муддатга божхона тўловларини кечиктириш учун рухсат берилади. Мана шу жараёнда божхона ходими суғурта компанияси билан жиноий тил бириктириб, ноқонуний равишда суғурта компанияси манфаатини кўзлаган. Жойлардан бу ҳолат юзасидан маълумот олингач, қўмита раҳбарияти текширув тайинлади. Аниқланишича, жиноий гуруҳ 145 миллиард сўмга яқин суғурталаш орқали тушумларни ўзлаштирмоқчи бўлган. Албатта, бунда ходимнинг ҳам аралашуви бор. У ходимни 2-3 ой давомида кузатдик. Ҳозирда унинг ҳаракатларида жиноят элементлари бўлгани учун ҳибсга олинган. Беш қўл баробар эмас экан. Афсуски, шундай ҳолатлар ҳам учраб турибди. Ходим жиноий гуруҳларга аралашган. Бугунги кунда давлат манфаатларига етказилмоқчи бўлган 145 миллиард сўм зарардан 84 миллиард сўми ундирилди. Жиноий гуруҳнинг 1-2 нафар аъзоси чет элга қочиб кетган. Уларга нисбатан қидирув эълон қилинган. Ҳолатга аралашган ҳар бир шахс жавоб беради”, — деди қўмита расмийси.
Илҳом Мухторовнинг қўшимча қилишича, ҳозирда тизимни рақамлаштириш ишлари жадал амалга оширилмоқда. Бу орқали кўплаб жиноятларнинг олдини олишга эришиляпти. Жумладан, Марказлаштирилган масофавий электрон декларациялаш постида 116 нафар божхона ходимлари томонидан тадбиркорлар билан бевосита мулоқоти чекланган ҳолда товарлар масофавий расмийлаштирилмоқда. Ушбу божхона постида республика бўйича расмийлаштирилаётган жами декларацияларнинг 50 фоизи (кунига 3 мингта) қамраб олинган.
Изоҳ (0)