Жорий йилнинг 11 ойида ишлаб чиқарилган электр энергияси ҳажми 2022 йилнинг мос давридагига нисбатан 3 млрд кВт соатга ошди, газ ҳажми эса 4,6 млрд кубометрга камайди. Бу ҳақда Статистика агентлиги эълон қилган ҳисоботда маълумот берилган.
Январь–ноябрь ойларида мамлакатда 69,7 млрд кВт соат электр энергияси ишлаб чиқарилди. Ўтган йилги кўрсаткич 66,7 млрд кВт соат бўлган. Статистик рақамларга кўра, 2022 йил якунида 74,3 млрд кВт соат, 2021 йилда 72 млрд кВт соат электр энергияси ишлаб чиқарилган.
Республикада 11 ойлик табиий газ қазиб олиш кўрсаткичи 42,7 млрд кубометрни ташкил этди. 2022 йилнинг мос даврида қазилган газ ҳажми жорий рақамлардан 4,6 млрд кубометрга кўп эди (47,3 млрд кубометр).
Маълумот учун, 2022 йил якунида 51,7 млрд кубометр, 2021 йилда эса 53,8 млрд кубометр табиий газ қазиб олинган.
Эслатиб ўтамиз, ноябрдаги Олий Мажлис Қонунчилик палатаси йиғилишида энергетика вазири Жўрабек Мирзамаҳмудов жорий куз-қиш даврида мамлакатда электр энергиясига бўлган талаб 45 млрд кВт соатга етиши кутилаётганини айтганди. Бу ўтган йилнинг куз–қишидагига нисбатан 3,5 миллиард кВт соатга кўп.
“Талабни қондириш учун 42,6 млрд кВт соат электр энергияси ишлаб чиқариш, қўшни давлатлардан 5,2 млрд кВт соат электр энергияси импорт қилиш режалаштирилган”, — деган вазирлик раҳбари.
Вазир сўзи давомида куз-қиш даврида аҳолининг табиий газга бўлган талаби 28 млрд кубометрни ташкил этиши (2022 йилгидан 2,5 млрд кубометр кўп) кутилаётганини айтган.
“Бу талабни қоплаш учун “Ўзбекнефтгаз” АЖ томонидан 16,2 млрд кубометр, хорижий ва қўшма корхоналар томонидан 10 млрд кубометр табиий газ қазиб чиқариш таъминланади. Шунингдек, қўшни давлат ҳамда шимолдан қўшимча газ импорт қилиб, ички бозорга йўналтирамиз”, — деган Жўрабек Мирзамаҳмудов.
Изоҳ (0)