Ўзбекистоннинг 2024 йилги солиқ-бюджет сиёсатида энергетик ҳамда таркибида шакар бўлган газли ичимликларга акциз солиғи белгилаш назарда тутилмоқда. Бу ҳақда бош вазир ўринбосари, иқтисодиёт ва молия вазири Жамшид Қўчқоров Сенатнинг навбатдаги ялпи мажлисида маълум қилди.
Жамшид Қўчқоровнинг айтишича, бундай ичимликлар учун солиқ солиниши соғлом турмуш тарзи ва табиатни асрашни тарғиб қилиш мақсадида жорий этилади.
“Келгуси йилда асосий солиқ турлари бўйича солиқ ставкалари ўзгартиришсиз қолдирилмоқда. Айрим кичик ўзгаришлар бор. Жумладан, соғлом турмуш тарзи ва табиатни асраш борасида бир қатор таклифлар киритилган. Хусусан, 2024 йил 1 апрелдан таркибида шакар мавжуд бўлган газланган ичимликларнинг 1 литри учун 500 сўмдан, энергетик ичимликларнинг 1 литри учун 2 000 сўм миқдорида акциз солиғи жорий этилмоқда”, — деди вазир.
Қўшимча қилинишича, келаси йил 1 июлдан бошлаб автмобил шиналаридан 1 донаси учун (вазнидан келиб чиққан ҳолда) базавий ҳисоблаш миқдорининг 0,3 фоизи миқдорида утилизация йиғими жорий этилади. Шу билан бирга, 2024 йил 1 январдан сигареталар импортига акциз солиғи 5 фоизга пасайтирилади.
Аввалроқ иқтисодиёт ва молия вазири ўринбосари Аҳадбек Ҳайдаров 2024 йил учун бегиланаётган асосий солиқ ставкалари ҳақида батафсил маълумот берганди.
Изоҳ (0)