Туркиянинг “Галатасарой” клуби Instagram саҳифасида ҳужумчи Мауро Икардининг жароҳатланган юзининг суратини жойлади ва “Фақат ўзлари учун адолатни истаганлар турк футболини барча каналлар орқали манипуляция қилишда давом этмоқда. ВАР ҳам 26 та камера буни кўрмади ва биз бундан уялдик. Туркия футболини бу даражага олиб келганлар шарманда бўлади”, — дея изоҳ қолдирди.
Туркия чемпионатининг 18-туридан ўрин олган “Галатасарой” ҳамда “Фенербаҳче” ўртасидаги баҳс (0:0) турли мунозараларга сабаб бўлди. Ўйин вақтида “Галатасарой” ҳужумчиси Мауро Икардига “Фенербаҳче” футболчиси мушт туширди. Буни ҳакам ҳам, ВАР ҳам кўрмади.
Ўйиндан сўнг “Фенербаҳче” футболчиси Эдин Жеко: “Икарди боши билан дарвоза устунига урилди, энди эса улар Мауронинг суратини қўйиб, пенальти берилиши кераклигини айтмоқда. Бу улар учун одатий ҳол. Шармандалик”, — деб айтиб ўтди.
Туркия чемпионатида декабрь ойининг ўзида 4 марта бошбошдоқлик кузатилди. Чемпионатдаги назорат ишдан чиққандек. Келинг, декабрь ойида Туркия футболида юз берган кўнгилсизликларга тўхталиб ўтамиз.
Ҳакам юзига мушт туширган клуб президенти
11 декабрь куни Туркия Суперлигасининг 15-турида “Анкарагюжю” “Ризеспор” билан 1:1 ҳисобида дуранг натижа қайд этди.
Бош ҳакам Ҳалил Мелер биринчи бўлимда мезбонларнинг битта голини ҳисобга олмади ва 50-дақиқада ҳужумчи Али Соуни майдондан четлатди.
Ўйин тугаганидан сўнг “Анкарагюжю” президенти Фарук Кожа майдонга тушиб келиб, Мелерга мушт туширди. Ҳакам ерга йиқилгач, уни бир неча бор тепди.
Мелерга биринчи ёрдам кўрсатилган. Шундан сўнг у шифохонага олиб кетилган.
Туркия президенти Ражаб Тоййиб Эрдўғон бу воқеага муносабат билдирди: “Мен бу воқеани қоралайман. Ҳакамнинг тезроқ тузалишини тилаб қоламан.
Спорт — бу тинчлик ва биродарлик. Спорт зўравонликка қарши бўлиши керак. Турк спортида зўравонликка йўл қўймаймиз”.
Ҳакам Мелернинг ўзи ҳам кейинроқ вазият ҳақида гапириб берди: “Фарук Кожа чап кўзимга мушт туширди, йиқилганимдан сўнг эса оёғи билан юзимга ва танамнинг бошқа қисмига бир неча бор тепди.
У менга ва шерикларимга ўлдириш билан таҳдид қилди. “Сени ўлдираман” деб дағдаға қилди. Улар билан келишмоқчи эмасман. Улар устидан шикоят аризасини ташладим. Бошқа гапим йўқ”.
12 декабрь санасида “Анкарагюжю” президенти Фарук Кожа истеъфога чиқарилди. 15 декабрь куни эса Кожа умрбод футболдан четлатилгани ва 2 миллион лира (62800 евро) жаримага тортилгани, шунингдек, клуб 5 та ўйинни мухлисларсиз стадионда ўтказиши маълум қилинди.
Ўйин пайти майдонга тушиб келган клуб президенти
19 декабрь куни Туркия чемпионатида яна бир кўнгилсиз воқеа сабаб бўлди. Туркия Суперлигасининг 17-туридан ўрин олган “Истанбулспор” ва “Трабзонспор” ўртасидаги баҳс охирига етказилмади. Бунга сабаб “Истанбулспор” президенти ўз футболчиларини майдонни тарк этишга чақиргани бўлди.
Учрашувнинг 74-дақиқасида, “Трабзонспор” 2:1 ҳисобида олдинда бораётган вақтда, Эртугрул Доган ва клубнинг бошқа вакиллари майдонга тушиб келди. Бир оз муддатдан сўнг иккала жамоа ва ҳакамлар майдонни тарк этди.
“Истанбулспор” футболчилари президентни тинчлантиришга уринган, бироқ Доган 68-дақиқада ҳакам томонидан жамоа фойдасига белгиланмаган пенальтидан норозилини билдирган ва барчадан майдонни тарк этишини сўраган.
Футболчилар ўртасида муштлашув, 5 та қизил карточка
21 декабрь куни эса Туркия чемпионатининг 2-дивизионидан ўрин олган “Бурсаспор” ва “Диёрбакирспор” жамоалари ўртасидаги баҳсда оммавий жанжал юз берди.
Ўйин 2:0 ҳисобида “Диёрбакирспор” фойдасига ҳал бўлаётган пайт, меҳмонлар футболчиси Бунямин Гезер иккинчи голни урганидан сўнг “Бурсаспор” футболчиси Чағатай Йилмаз билан баҳслашиб қолди.
Йилмаз қизил карточка олганидан сўнг, жамоалар футболчилари ўртасида муштлашув бошланиб, унга полиция аралашишга мажбур бўлди. Жанжал вақтида мухлислар трибунадан майдонга турли хил нарсаларни улоқтирган.
Ҳодиса оқибатида “Диёрбакирспор”нинг уч нафар футболчиси ва “Бурсаспор”нинг икки нафар футболчиси қизил карточка олди. Шунингдек, “Бурсаспор” футболчилари “Диёрбакирспор” ўйинчиси кийим алмаштириш хонасига қочаётганда, уни таъқиб қилгани маълум бўлган.
Изоҳ (0)