Футбол бўйича Туркия чемпионати 2-дивизионидан ўрин олган ўйинда оммавий муштлашув юз берди.
Воқеа 2-дивизион 18-туридан ўрин олган “Бурсаспор” ва “Диёрбакирспор” ўртасидаги баҳсда юз берган.
Ўйин 2:0 ҳисобида “Диёрбакирспор” фойдасига ҳал бўлаётган пайт, меҳмонлар футболчиси Бунямин Гезер иккинчи голни урганидан сўнг “Бурсаспор” футболчиси Чағатай Йилмаз билан баҳслашиб қолди.
Йилмаз қизил карточка олганидан сўнг, жамоалар футболчилари ўртасида муштлашув бошланиб, унга полиция аралашишга мажбур бўлди. Жанжал вақтида мухлислар трибунадан майдонга турли хил нарсаларни улоқтирган.
Ҳодиса оқибатида “Диёрбакирспор”нинг уч нафар футболчиси ва “Бурсаспор”нинг икки нафар футболчиси қизил карточка олди. Шунингдек, “Бурсаспор” футболчилари “Диёрбакирспор” ўйинчиси кийим алмаштириш хонасига қочаётганда, уни таъқиб қилгани маълум бўлган.
Воқеа бўйича Туркия футбол федерацияси ҳали муносабат билдирмади.
Изоҳ (0)