Turkiyaning “Galatasaroy” klubi Instagram sahifasida hujumchi Mauro Ikardining jarohatlangan yuzining suratini joyladi va “Faqat o‘zlari uchun adolatni istaganlar turk futbolini barcha kanallar orqali manipulyatsiya qilishda davom etmoqda. VAR ham 26 ta kamera buni ko‘rmadi va biz bundan uyaldik. Turkiya futbolini bu darajaga olib kelganlar sharmanda bo‘ladi”, — deya izoh qoldirdi.
Turkiya chempionatining 18-turidan o‘rin olgan “Galatasaroy” hamda “Fenerbahche” o‘rtasidagi bahs (0:0) turli munozaralarga sabab bo‘ldi. O‘yin vaqtida “Galatasaroy” hujumchisi Mauro Ikardiga “Fenerbahche” futbolchisi musht tushirdi. Buni hakam ham, VAR ham ko‘rmadi.
O‘yindan so‘ng “Fenerbahche” futbolchisi Edin Jeko: “Ikardi boshi bilan darvoza ustuniga urildi, endi esa ular Mauroning suratini qo‘yib, penalti berilishi kerakligini aytmoqda. Bu ular uchun odatiy hol. Sharmandalik”, — deb aytib o‘tdi.
Turkiya chempionatida dekabr oyining o‘zida 4-marta boshboshdoqlik kuzatildi. Chempionatdagi nazorat ishdan chiqqandek. Keling, dekabr oyida Turkiya futbolida yuz bergan ko‘ngilsizliklarga to‘xtalib o‘tamiz.
Hakam yuziga musht tushirgan klub prezidenti
11-dekabr kuni Turkiya Superligasining 15-turida “Ankaragyujyu” “Rizespor” bilan 1:1 hisobida durang natija qayd etdi.
Bosh hakam Halil Meler birinchi bo‘limda mezbonlarning bitta golini hisobga olmadi va 50-daqiqada hujumchi Ali Souni maydondan chetlatdi.
O‘yin tugaganidan so‘ng “Ankaragyujyu” prezidenti Faruk Koja maydonga tushib kelib, Melerga musht tushirdi. Hakam yerga yiqilgach, uni bir necha bor tepdi.
Melerga birinchi yordam ko‘rsatilgan. Shundan so‘ng u shifoxonaga olib ketilgan.
Turkiya prezidenti Rajab Toyyib Erdo‘g‘on bu voqeaga munosabat bildirdi: “Men bu voqeani qoralayman. Hakamning tezroq tuzalishini tilab qolaman.
Sport — bu tinchlik va birodarlik. Sport zo‘ravonlikka qarshi bo‘lishi kerak. Turk sportida zo‘ravonlikka yo‘l qo‘ymaymiz”.
Hakam Melerning o‘zi ham keyinroq vaziyat haqida gapirib berdi: “Faruk Koja chap ko‘zimga musht tushirdi, yiqilganimdan so‘ng esa oyog‘i bilan yuzimga va tanamning boshqa qismiga bir necha bor tepdi.
U menga va sheriklarimga o‘ldirish bilan tahdid qildi. “Seni o‘ldiraman” deb dag‘dag‘a qildi. Ular bilan kelishmoqchi emasman. Ular ustidan shikoyat arizasini tashladim. Boshqa gapim yo‘q”.
12-dekabr sanasida “Ankaragyujyu” prezidenti Faruk Koja iste’foga chiqarildi. 15-dekabr kuni esa Koja umrbod futboldan chetlatilgani va 2 million lira (62800 yevro) jarimaga tortilgani, shuningdek, klub 5 ta o‘yinni muxlislarsiz stadionda o‘tkazishi ma’lum qilindi.
O‘yin payti maydonga tushib kelgan klub prezidenti
19-dekabr kuni Turkiya chempionatida yana bir ko‘ngilsiz voqea sabab bo‘ldi. Turkiya Superligasining 17-turidan o‘rin olgan “Istanbulspor” va “Trabzonspor” o‘rtasidagi bahs oxiriga yetkazilmadi. Bunga sabab “Istanbulspor” prezidenti o‘z futbolchilarini maydonni tark etishga chaqirgani bo‘ldi.
Uchrashuvning 74-daqiqasida, “Trabzonspor” 2:1 hisobida oldinda borayotgan vaqtda, Ertugrul Dogan va klubning boshqa vakillari maydonga tushib keldi. Biroz muddatdan so‘ng ikkala jamoa va hakamlar maydonni tark etdi.
“Istanbulspor” futbolchilari prezidentni tinchlantirishga uringan, biroq Dogan 68-daqiqada hakam tomonidan jamoa foydasiga belgilanmagan penaltidan norozilini bildirgan va barchadan maydonni tark etishini so‘ragan.
Futbolchilar o‘rtasida mushtlashuv, 5 ta qizil kartochka
21-dekabr kuni esa Turkiya chempionatining 2-divizionidan o‘rin olgan “Bursaspor” va “Diyorbakirspor” jamoalari o‘rtasidagi bahsda ommaviy janjal yuz berdi.
O‘yin 2:0 hisobida “Diyorbakirspor” foydasiga hal bo‘layotgan payt, mehmonlar futbolchisi Bunyamin Gezer ikkinchi golni urganidan so‘ng “Bursaspor” futbolchisi Chag‘atay Yilmaz bilan bahslashib qoldi.
Yilmaz qizil kartochka olganidan so‘ng, jamoalar futbolchilari o‘rtasida mushtlashuv boshlanib, unga politsiya aralashishga majbur bo‘ldi. Janjal vaqtida muxlislar tribunadan maydonga turli xil narsalarni uloqtirgan.
Hodisa oqibatida “Diyorbakirspor”ning uch nafar futbolchisi va “Bursaspor”ning ikki nafar futbolchisi qizil kartochka oldi. Shuningdek, “Bursaspor” futbolchilari “Diyorbakirspor” o‘yinchisi kiyim almashtirish xonasiga qochayotganda, uni ta’qib qilgani ma’lum bo‘lgan.
Izoh (0)