Enter Engeneering компанияси кечикаётган маошини талаб қилган ходимларини ишдан бўшатишни бошлади. Бу ҳақда “Дарё”га тўрт ойдан буён маош олмагани сабаб пулини талаб қилгани учун ариза ёздирилиб, ишдан олинган ходим маълум қилди.
Ишчининг маълумот беришича, у компаниянинг Бойсун туманидаги Бойсун газни қайта ишлаш заводида фаолият юритган.
Ишхонадан ойлик сўраб, Telegram’даги гуруҳга ёзгандим. Гуруҳдагиларга бошлиқлардан кечикаётган ойлигимизни сўрайлик, бориб ҳақимизни талаб қилайлик деб, ёзгандим. Буни кўриб қолган бошлиқлар “ўзимизнинг номимиздан ҳеч қандай эътирозимиз йўқ, ўз хоҳишимиз билан бўшаяпмиз” деб, ариза ёздириб олишди. Ва ишдан бўшатиб юборишди, — дейди ишдан ҳайдалганини айтган ходим.
“Дарё”га алоқага чиққан яна бир ходимнинг маълум қилишича, кеча, 12 декабрь куни иш аввалида раҳбарият офиси олдида йиғилган юзлаб ишчи кечикаётган маошини талаб қилган.
Таҳририятга юборилган видеоларда таъкидланишича, Бойсундаги завод ишчилари иш ташлашга ҳам уринган.
Мана Бойсундаги заводда иш ташлаш бўляпти. Иш ташлаймиз, ойлик йўқ, ойлик қани, — дейди раҳбарият жойлашган офис олдида кўриниш берган ишчилар.
“Дарё”га видео юборган яна бир ишчининг билдиришича, завод ходимларининг талабидан сўнг, раҳбарият вакиллари улар билан учрашган ва ишчилар маоши қачон берилишига қисман ойдинлик киритган.
“Чўнтагимизга қараб берамиз”, — дейди ҳолатдан норози масъул. Ва унинг бу гапини тасвирга олаётган ишчига эътироз билдириб, “ўчир телефонингни”, дея қўшимча қилади.
Фаолиятини 2012 йилда бошлаб, “Энг тараққий этаётган компаниялардан бири” дея ўзига таъриф берган Enter Engineering компанияси минглаб ишчиларига уч-тўрт ойдан буён маош бермаётгани хабар қилинганди.
Компания масъули “Дарё”нинг ишчилар маоши ўз вақтида берилмаслиги сабабини билишга қизиққанида, саволга ҳеч қандай изоҳ бермаганди. Мазкур муаммога Камбағалликни қисқартириш ва бандлик вазирлиги ҳам эътибор қаратган. Аммо ҳозирча, вазирлик масъуллари ҳам бу борада маълумот бермади.
Изоҳ (0)