Фаолиятини 2012 йилда бошлаб, региондаги энг тараққий этаётган компаниялардан бири дея ўзига таъриф берган Enter Engineering компанияси минглаб ишчиларига ўз вақтида маош бермаётгани хабар берилганди. Мазкур муаммога Камбағалликни қисқартириш ва бандлик вазирлиги ҳам эътибор қаратди. Ишчиларнинг “Дарё”га маълумот беришича, компаниянинг Тошкент вилояти Олмалиқ шаҳридаги масъуллари ишчилари билан учрашиб, вазиятни изоҳлаган.
Манбага кўра, масъуллар ва компания ишчилари бугун, 28 ноябрь куни учрашган.
Компаниянинг уч нафар масъули билан суҳбатлашган ишчиларнинг айтишича, ишчилар маоши кечикишига тайёр бўлган объектни қабул қилмаётган ва бажарилган иш учун пул тўламаган Олмалиқ кон-металлургия заводини айбдор қилиб кўрсатган.
Олмалиқ кон-металлургия заводи қабул қилмаяпти, қабул қилишса кейин пул бўлади дейишяпти, — дейди масъуллар изоҳини тинглаган ишчилардан бири.
Исм-фамилиясини очиқлашдан қўрққан ишчининг айтишича, масъуллар билан 200 нафарга яқин ходим кўришган.
Қолганлар ишини йўқотишдан қўрқяптими, ҳатто ойлигини талаб қилишга ҳам чўчиб қолишган, — дейди у.
Раҳбарияти билан кўришган ишчилар компания масъуллари ишчиларга хоҳласангиз ишланг, хоҳламасангиз ўзингиз биласиз, деган мазмунда билдириш қилган.
Маошимизни ололмай қолишдан қўрқяпмиз. Миллионлаб пулимиз ётибди уларда. Ўзбекистонда меҳнат қонунчилиги ҳамма учун бирдек бўлса, нега бизнинг компания бу қонунларга бўйсунмайди. Шартномамизда ҳам ойлик маош 45 кунгача кечикиши мумкин дейилган. Лекин биз уч-тўрт ойдан бери маош олмаяпмиз. Кечиккан ҳар бир кун учун маошимизга қўшимча пеня ҳам тўлаб беришадими?, — дейди ишчи.
Эслатиб ўтамиз, аввалроқ “Дарё” журналисти билан суҳбатлашган ишчилар минглаб ходимлар маош билан боғлиқ муаммога дуч келганини билдирганди.
Сентябрь ойидаги маошимизни ҳам олганимиз йўқ. Ҳали октябрь ойи турибди. Ойлик икки ярим, уч ойгача кечикяпти, — деганди шахси сир қолишини сўраган мурожаатчи.
Мурожаатчининг айтишича, шикоятчи кимлиги аниқланса, раҳбарият уни ишдан бўшатади. Ва ходимнинг ишсиз қолиш эҳтимоли катта. Шу сабаб улар муаммони баралла айтишдан қўрқади.
Сентябрь ойи учун маошимнинг 30 фоизини пластикка ташлаб беришган, қолган 70 фоизини нақд шаклда олишим керак. Лекин мана ноябрь ойи тугаяптики, сентябрь ойининг маошини ололганим йўқ. Ойликка қараб режа қиламиз, қўшнилардан қарз олавериб, қарзга ботиб кетдик, — деганди яна бир ишчи маошини ололмаётганини айтар экан.
Изоҳ (0)