Венесуэла қўшни Гайана ҳудудининг учдан икки қисмига эгалик ҳуқуқини даъво қилганидан сўнг, Гайана ҳукумати Бирлашган Миллатлар Ташкилотига мурожаат қилди ва АҚШдан ёрдам сўради.
Тhе Guardian нашрининг ёзишича, Венесуэла президенти Николас Мадуро Гайана ҳудудининг учдан икки қисмини ташкил этувчи 159,5 минг км² майдонни эгаллаган Эссекибони қўшиб олиш чораларини кўришни буюрганидан кейин Гайана БМТ ва АҚШга ёрдам сўраб мурожаат қилган.
3 декабрь куни венесуэлаликлар референдумда Эссекибонинг аннексия қилинишини маъқуллаган эди.
“БМТ бош котиби ва бир қанча миллий етакчилар билан гаплашдим. Мен уларни президент Мадуронинг хавфли тенденциялари ва пуч ҳаракатлари ҳақида огоҳлантирдим”, —деди Гайана президенти Ирфаан Али мамлакат халқига телемурожаатида.
Шу билан бирга, Николас Мадуро Венесуэла фуқаролари томонидан қабул қилинган қарорга мувофиқ, Эссекибони қўшиб олиш учун “чоралар кўришини” айтди. Мадуронинг сўзларига кўра, у Гайанада янги штат яратиш ва Эссекибо аҳолисига Венесуэланинг шахсий гувоҳномаларини бериш тўғрисидаги қонунни қабул қилишни буюрган. Шунингдек, у миллий нефть компанияларига нефтга бой минтақадан энергия ресурсларини қазиб олишни бошлаш ҳақида кўрсатма берди.
Аммо Гайана ва қўшни давлатларни энг ташвишга солаётган нарса Мадуронинг навбатдаги буйруғи: Венесуэла президенти Эссекибода “махсус ҳарбий қисм” ташкил этишни буюрган. Гайана ва Венесуэла билан чегарадош Бразилия аллақачон чегара ҳудудларига зирҳли техникаларини юборган. Мадуронинг Эссекибони аннексия қилишга уриниши Жанубий Америкада урушга олиб келиши мумкин деган хавотирлар бор.
Эссекибо минералларга бой ҳудуд бўлиб, ҳозирда Гайанага қарайди. Гайана чегаралари 1899 йилда ўрнатилган, аммо Венесуэла буни расман тан олмаган ва Эссекибони ўзининг тарихий ҳудуди деб билади.
Изоҳ (0)