Инглиз тили дунёдаги энг кенг тарқалган тил ҳисобланади, чунки у халқаро мулоқот учун энг кўп ишлатиладиган тилдир. Шу сабабли чет элга саёҳат қилганда аксарият сайёҳлар инглиз тилини билиш уларга дам олиш маскани билан боғлиқ кўплаб муаммоларни ҳал қилишда ёрдам беришига ишонишади.
Бироқ 2023 йил бўйича тайёрланган English Proficiency Index маълумотларига асосланиладиган бўлса, барча машҳур сайёҳлик мамлакатларида ҳам инглиз тилини яхши билишмайди.
2022 йилда 113 мамлакатда EF стандарти бўйича инглиз тили тестларини топширган 2,2 миллион нафар катта ёшлилар натижалари таҳлил қилиниб, ҳар бир мамлакатга максимал 800 баллдан келиб чиқиб рейтингдан жой берилди.
Натижада, резидентлари 647 балл тўплаган Нидерландия биринчи ўринни эгаллади. Умуман олганда, Европанинг ўнта давлати кучли 12 таликка кирди (инглиз тилини жуда юқори даражада биладиган давлатлар): Австрия (3), Дания (4), Норвегия (5), Швеция (6), Бельгия (7), Португалия (8) , Германия (10), Хорватия (11), Греция (12). Сингапур иккинчи, Жанубий Африка эса тўққизинчи ўринни эгаллади.
Иккинчи тоифада (юқори компетенсия) 18 та давлат бор, шу жумладан, Польша (13), Руминия (15), Венгрия (17), Словакия (18), Финляндия (14), Болгария (16), Литва (21), Люксембург (22), Эстония (23), Сербия (24), Чехия (26) ва Швейцария (30) каби Европа давлатлари ҳам ушбу туркумга киритилган.
Учинчи тоифа (ўртача компетенция) давлатлари орасида Грузия (32), Испания, Италия, Молдова (ҳар уччаласи 35-ўрин), Альбания (39) ва Франция (43), Украина (45), Арманистон (48) бор.
Покистон (64), Ливан (65), Туркия (66), Озарбайжон (83) каби давлатлар тўртинчи тоифадан (паст компетенсия) ўрин олди.
Бешинчи тоифага (жуда паст компетенсия) жами 22 давлат киритилган бўлиб, улар орасида Ўзбекистон (93) ҳам бор.
Инглиз тили билан боғлиқ энг ёмон аҳвол Конго Демократик Республикасида (113), Тожикистонда (112) ва Яманда (111) кузатилган.
Изоҳ (0)