Бразилия Мудофаа вазирлиги Эссекибо минтақасида юзага келиши мумкин бўлган урушнинг бир нечта сценарийларини кўриб чиқмоқда. Вазир Хосе Мусио Венесуэла чегараларига 20 та зирҳли техника ва 130 нафар аскар жўнатишни режалаштираётганини маълум қилди.
G1 нашри манбасига таяниб, Бразилия расмийлари Венесуэла ва Эссекибо минтақаси чегарасида жанговар тайёргарлик даражасини оширганини ёзмоқда. Нашрнинг қайд этишича, Бразилия мамлакати раҳбарияти можаро эҳтимоли йўқ деб ҳисоблайди ва ҳозирда аралашмаслик позициясидан туриб ҳаракат қилмоқда.
Венесуэлада 3 декабрь куни референдум бўлиб ўтди, унда Гаяна-Эссекибо штатини яратиш ғояси илгари сурилган. 2015 йилда бой нефть конлари топилган минтақа ҳозирда қўшни Гаяна давлати таркибига киради. Венесуэла ҳукумати референдумда овоз берганларнинг 95 фоизи янги штат тузиш ғоясини қўллаб-қувватлаганини маълум қилди.
Венесуэла президенти Николас Мадуро 4 декабрь куни мамлакат Эссекибони қайтариши мумкинлигини айтиб ўтди.
Гаяна вице-президенти Бҳаррат-Жагдео эса ҳукумат вазият кескинлашувига тайёрланаётгани ва мудофаасини кучайтиришга ҳаракат қилаётганини маълум қилган.
Изоҳ (0)