Венесуэла президенти Николас Мадуро қўшни Гаянанинг ғарбий қисми – Эссекибони мамлакатнинг 24-штати деб эълон қилди. У Венесуэла Миллий ассамблеясини баҳсли ҳудудни ҳимоя қилиш бўйича қонун қабул қилишга чақирди, деб хабар беради Ultimas Noticias. Минтақага Гаяна-Эссекибо номи берилди.
Николас Мадуро қўшиб олинган ҳудудда газ, нефть ва фойдали қазилмаларни қазиб олиш учун лицензия берувчи идоралар яратишни таклиф қилди. У чегара ўрнатилмаган денгизда ишлаётган нефть компанияларига операцияларни якунлаш учун уч ой вақт берди.
Халқаро ҳуқуқни ҳурмат қилган ҳолда, қонунларни ҳурмат қилган ҳолда, яхши қўшничиликни ҳурмат қилган ҳолда, — деди Мадуро.
Венесуэла президенти, шунингдек, парламентга “Гаяна томонидан бир томонлама берилган имтиёзлар асосида ишлайдиган” компаниялар билан шартномалар тузишни тақиқлашни муҳокама қилишни буюрди.
Унинг қўшимча қилишича, яқин кунларда “барча мактаб, коллеж ва университетлар” Венесуэланинг янги харитасига киритилади.
1966 йил 17 февралда Венесуэла ва Гаяна Женева шартномасини имзолаган. Ҳужжат минтақадаги ҳудудий низоларни ҳал қилишда Гаянани Британия империясининг ворисига айлантирган. 1899 йилда Париждаги арбитраж суди Эссекибо ҳудудини Гаянанинг бир қисми деб тан олди. Гаяна расмийлари ушбу қарорни тасдиқлашни сўраб Халқаро Судга мурожаат қилди; суд Венесуэлани Гаяна ҳудуди устидан назоратни шубҳа остига қўядиган ҳаракатлардан тийилишга буюрди. Бироқ суд референдум ўтказишни тақиқламади.
Венесуэлада 3 декабрь куни референдум бўлиб ўтди, унда Гаяна-Эссекибо штатини яратиш ғояси илгари сурилди. Венесуэла ҳукумати референдумда овоз берганларнинг 95 фоизи янги штат тузиш ғоясини қўллаб-қувватлаганини маълум қилди.
Изоҳ (0)