Давлат активларини бошқариш агентлиги “Ўзтемирйўлконтейнер” устав капиталидаги 35 фоиз давлат улушини хусусийлаштириш жараёнлари тўхтатилганини маълум қилди.
Қайд этилишича, темирйўл транспорти соҳасининг бизнес жараёнларини рақамлаштириш, бошқарувнинг замонавий усулларини жорий этиш ва республиканинг транзит салоҳиятидан самарали фойдаланиш, юк ташишда таннарх ва харажатларни камайтириш мақсадида “Ўзбекистон темир йўллари” ва унинг тизим корхоналари ислоҳ қилинмоқда. Ушбу жараёнда “Ўзтемирйўлконтейнер” “Темирйўлкарго” АЖ сифатида қайта ташкил этилмоқда.
Шунга кўра, “Ўзтемирйўлконтейнер” устав капиталидаги 35 фоиз давлат улушини хусусийлаштириш жараёнлари тўхтатилган.
“Ушбу сотиш жараёни бўйича аввалги чоп этилган эълонларда Давактив агентлиги ва унинг маслаҳатчиси сотиш жараёнининг муддатига ўзгартириш киритиш ҳамда тўхтатиш ҳуқуқини ўзида сақлаб қолиши қайд этилганлиги эслатиб ўтилади”, — дейилади хабарда.
“Ўзтемирйўлконтейнер” “Ўзбекистон темир йўллари” контейнер паркининг оператори бўлган ҳолда мамлакат ҳудуди орқали контейнер ташишни ташкил этиш бўйича хизматларнинг тўлиқ тўпламини тақдим этади.
- “Ўзтемирйўлконтейнер” функцияларига Ўзбекистон темирйўлларининг контейнер паркини бошқариш, жумладан, ички ва халқаро ташишларда контейнерларда юк ташишни режалаштириш масалалари киради.
- Компания 2002 йилда ташкил этилган.
- Бугунги кунга қадар “Ўзтемирйўлконтейнер” тизимида республика бўйлаб 20 дан ортиқ логистика марказлари мавжуд.
Эслатиб ўтамиз, сентябрь охирларида президент Шавкат Мирзиёев ҳузурида темирйўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.
Изоҳ (0)