Халқаро тараққиёт агентлиги (USAID) администратори Саманта Пауэр Ўзбекистон халқини қўллаб-қувватлаш учун 14 миллион доллардан ортиқ маблағ ажратилишини эълон қилди. Бу ҳақда АҚШнинг мамлакатдаги элчихонаси хабар берди.
Ушбу қўшимча ёрдам воситасида Қўшма Штатлар USAID орқали қуйидаги соҳаларда ҳамкорлик қилади:
Силга қарши кураш
Ўзбекистон дори-дармонга чидамли сил касаллигининг юқори даражадалиги билан курашиб келмоқда. USAID беш йиллик ташаббус саналган “Силдан холи Ўзбекистон” дастурини ишга тушириб, у орқали кенг қамровли қўллаб-қувватлаш хизматларини тақдим этиш ва мамлакат бўйлаб силга қарши асосий хизматлардан фойдаланиш имкониятини ошириш мақсадида қўшимча 3,2 миллион доллар сармоя киритади.
“Силдан холи Ўзбекистон” дастури касаллик юқишининг олдини олиш ва аниқлаш, даволашни бошлаш, сил касаллигининг стигмасини камайтириш, шунингдек, ахборот тизимлари ва молиялаштиришни такомиллаштириш бўйича Ўзбекистонда соғлиқни сақлаш соҳасида олиб борилаётган ислоҳотларни илгари суришда ёрдам беради. 2002 йилдан бери USAID Ўзбекистоннинг силга қарши курашдаги саъй-ҳаракатларини қўллаб-қувватлаш учун қарийб 60 миллион доллар сармоя киритган.
Эпидемия ва пандемия таҳдидларига қарши кураш
USAID глобал соғлиқни сақлаш хавфсизлигини мустаҳкамлашда Ўзбекистон ҳукумати билан ҳамкорлик қилади. 4 миллион долларлик сармоя Ўзбекистоннинг келажакдаги таҳдидлар, эпидемиялар ва пандемияларга чидамлилигини ошириш учун энг яхши тажриба ва COVID-19 чора-тадбирларидан олинган сабоқларга йўналтирилади. Шунингдек, ушбу маблағ Ўзбекистонга лаборатория ва кузатув тизимларини фавқулодда вазиятларга тайёргарлигини, хавф-хатарлар чоғида алоқа боғлаш ва жамоатчилик билан ҳамкорликни кучайтириш имконини беради.
Бизнес ва хусусий секторни мустаҳкамлаш
USAID туризм, ахборот-коммуникация технологиялари ва яшил иқтисодиёт каби мақсадли тармоқлар ёрдамида Ўзбекистон иқтисодиётини мустаҳкамлаш учун 3,5 миллион доллар сармоя киритади. Ушбу дастур иш ўринлари яратиш, иқтисодий инклюзивликни яхшилаш, кичик ва ўрта корхоналар учун экспорт бозорларини ривожлантириш ва капитални жалб қилиш имконини беради.
USAID аёллар, ёшлар ва имконияти чекланганлар учун ўз бизнесини очиш ва фаолият юритишини қийинлаштирадиган сиёсий ва иқтисодий тўсиқларни бартараф этиш бўйича иш олиб боради. Бундан ташқари, USAID Ўзбекистон бизнес корхоналарига электрон тижорат ва савдони ривожлантириш имконини берувчи АҚШ технологияларини жорий этишда кўмаклашади.
Янада масъулиятли ва самарали маҳаллий бошқарув
Ўзбекистоннинг 2030 йилгача бўлган стратегиясини қўллаб-қувватлаган ҳолда ҳамда Конгресс билан ҳамкорликда USAID янги маҳаллий бошқарув дастури орқали Ўзбекистонда вилоят ва маҳаллий бошқарувни кучайтириш учун 3,5 миллион доллар миқдорида маблағ ажратади. Бу орқали USAID вилоят ва маҳаллий ҳокимиятлар янада эътиборли, халқ билан биргаликда ишловчи ва масъулиятли бўлиши ҳамда ўзбек халқига давлат хизматларини яхшироқ кўрсатиш имкониятига эга бўлишини кўзлайди.
Ушбу ташаббус доирасида миллий ва маҳаллий ҳукуматлар, фуқаролик жамияти ва хусусий сектор билан биргаликда маҳаллий давлат ҳокимияти органларининг бюджетлари ва харажатларида шаффофликни ошириш, давлат амалдорларини янги мажбуриятларни бажаришга ўргатиш, фуқаролар ва жамоаларни маҳаллий ҳукуматлар фаолиятини назорат қилишлари ва ўз эҳтиёжларини қондирадиган давлат хизматларини тарғиб қилишлари учун зарур бўлган воситалар, кўникма ва ресурслар билан таъминлаш мақсад қилинади. USAID, шунингдек, децентрализация ва маҳаллий бошқарув бўйича маълумотларга асосланган миллий сиёсат ва қонунчиликни ишлаб чиқишда ҳукуматни қўллаб-қувватлайди.
Шавкат Мирзиёев 23 октябрь куни АҚШ Халқаро тараққиёт агентлиги (USAID) администратори Саманта Пауер бошчилигидаги делегацияни қабул қилгани тўғрисида хабар берилганди. Конструктив ва ўзаро манфаатли ҳамкорликни янада ривожлантириш масалалари кўриб чиқилган.
Изоҳ (0)