“Ўзбекистон темир йўллари” туркиялик сайёҳдан 100 минг сўм пора олиб, унга яхши шароит яратиб берган ходимини тополмаганини тан олди.
Тармоқларда Андижон йўловчи поездида турк сайёҳи ўз вагонидан юқори тоифадаги вагонга ўтиш учун вагон кузатувчисига пул берганлиги ва вагон тоифасини ўзгартирганлиги юзасидан тарқалган ҳолат бўйича ўрганиш олиб борилди. Видеода керакли маълумотлар (қайси кун, поезд рақами ва вагон) акс этмаганлиги сабабли ҳолат ўз исботини топиши ва айбдор ходимни аниқлашнинг имконияти топилмади, — дейилади масъул ташкилотнинг бу ҳақдаги расмий баёнотида.
“Ўзбекистон темир йўллари”нинг тан олишича, ижтимоий тармоқларда хорижлик фуқаролар томонидан, йўловчи поездларда йўл давомида вагон кузатувчисига пул таклиф этиб, вагондаги ўринни юқорироқ даражадаги вагон ўрнига алмаштирганлиги ҳақидаги видеороликлар жамоатчилик муҳокамасига сабаб бўлмоқда.
Хусусан нидерландиялик блогер томонидан 6 июль куни “Афросиёб” электропоездида сафари давомида “эконом” тоифадаги ўрнини “вип” тоифага ўзгартирганлиги бўйича видеороликлар тарқалди. Ушбу ҳолат бўйича хизмат текшируви тайинланиб, хизмат текшируви хулосасига асосан айбдор ходим лавозимидан озод этилган бўлишига қарамасдан октябрь ойида ушбу видеолавҳа ижтимоий тармоқларда қайта тарқатилди ва кенг муҳокамага сабаб бўлди.
Ушбу жараёнда ОАВларда тарқатилаётган ҳар бир маълумот, фуқароларимиз ва юртимизга ташриф буюрган меҳмонларнинг мамлакатимиз темир йўллари ҳақида салбий тасаввурлар пайдо бўлишига олиб келади. Шу боис, “Ўзтемирйўлйўловчи” АЖ раҳбарияти фуқароларимизнинг ижтимоий тармоқларда исботланмаган, асоссиз маълумотларни тарқатмаслигингизни сўрайди, — дейди масъул ташкилотнинг ахборот беришга масъул ходимлари.
“Ўзтемирйўлйўловчи” АЖ раҳбарияти шундай ҳолатларга дуч келган фуқаролардан жамиятнинг (+99871-299-94-50) ишонч телефонига қўнғироқ қилишни ёки @pastrans Telegram манзилига мурожаат қолдиришни сўрамоқда.
Изоҳ (0)