Oliy Majlis Qonunchilik palatasi majlisida “O‘zbekiston Respublikasining ayrim qonun hujjatlariga jinoyatchilikka qarshi kurashish bo‘yicha faoliyatning huquqiy asoslarini takomillashtirishga qaratilgan qo‘shimcha va o‘zgartirishlar kiritish to‘g‘risida”gi qonun loyihasi ikkinchi o‘qishda ko‘rib chiqildi.
Taklif etilayotgan qonun loyihasi bilan “Tezkor-qidiruv faoliyati to‘g‘risida”gi qonuniga ma’lumotlarni to‘plash, tezkor kiritish, niqoblangan operatsiya kabi tezkor-qidiruv tadbirlarini amalga oshirish tartibini aniqlashtirishni, shuningdek, axborot texnologiyalari sohasidagi jinoyatchilikka qarshi kurashishning huquqiy asoslarini mustahkamlashni, tezkor-qidiruv tadbirlari axborot-kommunikatsiya texnologiyalarini qo‘llagan holda, shu jumladan, kibermakonda va (yoki) uning imkoniyatlaridan foydalangan holda o‘tkazilishi mumkin ekanini belgilashni nazarda tutuvchi qo‘shimcha va o‘zgartirishlar kiritilmoqda.
Deputatlarning aytishicha, ushbu qonun loyihasining qabul qilinishi jamoat tartibini saqlashni va fuqarolar xavfsizligini yanada ishonchli ta’minlashga, shuningdek, huquqbuzarliklar profilaktikasi va jinoyatchilikka qarshi kurashish bo‘yicha tadbirlar samaradorligini oshirishga ko‘maklashadi.
“Qizg‘in bahs-munozaralar, savol-javoblar va uzoq tortishuvlardan so‘ng, qonun loyihasi deputatlar tomonidan qabul qilindi”, — deyiladi xabarda.
Eslatib o‘tamiz, 2019-yilda prezident tomonidan imzolagan qonun bilan “Tezkor-qidiruv faoliyati to‘g‘risida”gi qonun to‘ldirilgan edi. O‘zgartirish bilan Mudofaa vazirligi harbiy razvedkasiga O‘zbekiston hududida tezkor-qidiruv faoliyatini amalga oshirish huquqi berilgandi. Boshqa davlat organlari, shuningdek, yuridik va jismoniy shaxslar tomonidan tezkor-qidiruv faoliyatini amalga oshirish taqiqlanadi.
Izoh (0)