Ички ишлар вазирлиги “Йўл ҳаракати хавфсизлигини таъминлаш соҳасини янада ривожлантиришга доир қўшимча чора-тадбирлар тўғрисида”ги ҳукумат қарори лойиҳасини муҳокамага қўйди.
Ҳужжат билан туман (шаҳар) ҳокимликлар, шу жумладан, давлат-хусусий шериклик асосида жалб қилинган инвесторлар томонидан автомобиль йўлларида йўл ҳаракати қоидалари бузилганини қайд этувчи махсус автоматлаштирилган фото ва видео қайд этиш дастурий-техник тизимларини ўрнатиш ва эксплуатация қилиш тартиби тўғрисидаги низом тасдиқланади.
Қайд этилган йўл ҳаракати қоидабузарликларидан ундирилган жарима суммасини тақсимлашнинг қуйидаги тартиби жорий этилади:
а) туман (шаҳар) ҳокимликлари томонидан ўрнатилган махсус автоматлаштирилган фото ва видео қайд этиш дастурий-техник тизимлари жорий этилиб, ишга туширилган кундан бошлаб:
- 30 фоизи – бевосита туман (шаҳар) маҳаллий бюджетига, мазкур маблағлар йўл ҳаракатини рақамлаштириш, йўл инфратузилмасини ривожлантиришга, йўл-патрул хизмати ходимларининг қўшимча штатларини киритишга мақсадли йўналтирилади;
- 50 фоизи –республика бюджетига;
- 10 фоизи –Ички ишлар вазирлигининг бюджетдан ташқари жамғармасига;
- 5 фоизи –Ички ишлар вазирлигининг Жамоат хавфсизлиги департаменти Йўл ҳаракати хавфсизлиги хизмати ДЙҲХХ моддий техника базасини ривожлантириш, ходимларни рағбатлантириш ва мукофотлаш жамғармасига;
- 5 фоизи —Давлат хавфсизлиги хизмати ҳузуридаги “Киберхавфсизлик маркази” давлат унитар корхонасига.
б) давлат-хусусий шериклик асосида жалб қилинган инвесторлар томонидан ўрнатилган махсус автоматлаштирилган фото ва видео қайд этиш дастурий-техник тизимлари жорий этилиб, ишга туширилган кундан бошлаб, давлат-хусусий шериклик тўғрисидаги битимнинг амал қилиш муддатигача:
- 30 фоизи – бевосита туман (шаҳар) маҳаллий бюджетига, мазкур маблағлар йўл ҳаракатини рақамлаштириш, йўл инфратузилмасини ривожлантиришга, йўл-патрул хизмати ходимларининг қўшимча штатларини киритишга мақсадли йўналтирилади;
- 25 фоизи – давлат-хусусий шериклик асосида жалб қилинган инвесторларнинг ҳисобварағига;
- 20 фоизи –республика бюджетига;
- 10 фоизи –Ички ишлар вазирлигининг бюджетдан ташқари жамғармасига;
- 10 фоизи – Ички ишлар вазирлигининг Жамоат хавфсизлиги департаменти Йўл ҳаракати хавфсизлиги хизмати ДЙҲХХ моддий техника базасини ривожлантириш, ходимларни рағбатлантириш ва мукофотлаш жамғармасига;
- 5 фоизи —Давлат хавфсизлиги хизмати ҳузуридаги “Киберхавфсизлик маркази” давлат унитар корхонасига йўналтирилади.
Бунда, Ички ишлар вазирлигининг Жамоат хавфсизлиги департаменти Йўл ҳаракати хавфсизлиги хизмати ДЙҲХХ моддий техника базасини ривожлантириш, ходимларни рағбатлантириш ва мукофотлаш жамғармасига йўналтирилган маблағлар Йўл ҳаракати хавфсизлиги хизмати Маъмурий амалиёт бўлими ходимларини рағбатлантириш, мукофотлаш ҳамда уларнинг моддий-техника базасини ривожлантиришга мақсадли сарфланади.
Ички ишлар вазирлиги уч ой муддатда:
- транспорт воситаларининг ҳаракатланиш жадаллиги ва охирги икки йилда содир этилган йўл ҳаракати қоидабузарликларининг таҳлили асосида йўл ҳаракати қоидалари бузилишини махсус автоматлаштирилган фото ва видео қайд этиш дастурий-техник тизимлари ўрнатилиши мумкин бўлган жойларнинг дислокациясини ишлаб чиқадива ушбу маълумотларни мунтазам равишда янгилаб борилишини ҳамда мазкур маълумотларни ҳар икки чоракда туман (шаҳар) ҳокимликларига юборилиши таъминлайди.
Эслатиб ўтамиз, 2020 йил декабрь ойида “Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида”ги президент қарори қабул қилинганди. Қарорга кўра, махсус автоматлаштирилган фото ва видео қайд этиш дастурий техник воситалари ўрнатиладиган жойларни тадбиркорларга бириктириш электрон аукцион савдолари орқали амалга оширилади.
Изоҳ (0)