Сенатнинг Мудофаа ва хавфсизлик масалалари қўмитасининг 5 апрель куни ўтказилган мажлисида навбатдаги ялпи мажлисда кўриб чиқилиши назарда тутилган масалалар дастлабки тарзда муҳокама қилинди. Бу ҳақда парламент юқори палатаси матбуот хизмати хабар берди.
Хусусан, мажлисда “Ўзбекистон Республикасининг Давлат чегараси тўғрисида”ги қонун муҳокама қилинган. Мазкур қонунда давлат чегарасини белгилаш, ўзгартириш, қўриқлаш ва ҳимоя қилиш соҳасидаги асосий тушунчалар, давлат чегарасини қуруқликда, чегара дарёларида, кўллар, самовий ҳудуд ва бошқа жойларда шахслар ва транспорт воситаларининг кесиб ўтиш тартиби ҳамда давлат чегараси ва ўтказиш пунктлари режими, режим талаблари, уларни бузиш тушунчалари аниқ белгиланиб, батафсил ёритиб берилмоқда.
Қонун билан Вазирлар Маҳкамаси ва Давлат хавфсизлик хизматига мос равишда чегара зонасида ва ўтказиш пунктларида чегара режимини ўрнатиш, ички ишлар органлари ва Давлат хавфсизлик хизмати Чегара қўшинларига уларнинг ваколатлари доирасида режимга риоя қилинишини таъминлаш юзасидан вазифалар юкланмоқда, ўтказиш пунктларида шахслар, транспорт воситалари, товарлар, бошқа мулк ва ҳайвонларга нисбатан чегара назорати тартиблари қонуний мустаҳкамланмоқда.
Қонунда Ўзбекистон фуқаролари, чет эл фуқаролари ва фуқаролиги бўлмаган шахслар ҳамда транспорт воситаларининг чегара зонасига ва ўтказиш пунктларига кириши (чиқиши), ўтиши, бўлиши (яшаши), ҳаракатланиши тартиблари ҳамда давлат чегарасида, чегара минтақасида ва ўтказиш пунктларида хўжалик ва бошқа фаолиятни олиб бориш қоидалари ва яна бир қатор масалалар батафсил белгиланяпти.
Мазкур қонун 9 боб ва 73 моддадан иборат бўлиб, унинг қабул қилиниши Ўзбекистон давлат чегарасини ишончли қўриқлаш ва ҳимоя қилишга, вазирлик ва идораларнинг давлат чегарасидаги ваколатларини тизимли равишда белгилашга, давлат чегарасини қўриқлаш ва ҳимоя қилишда қурол-яроғ, ҳарбий техника, махсус воситалар, жисмоний куч ва хизмат ҳайвонларини қўллаш тартибининг ҳуқуқий асосларини яратишга хизмат қилади.
Бундан ташқари, қўмита мажлисида “Ўзбекистон Республикасининг Маъмурий жавобгарлик тўғрисидаги кодексига Ўзбекистон Республикасининг Давлат чегарасини қўриқлаш ва ҳимоя қилишни янада кучайтиришга қаратилган қўшимча ва ўзгартишлар киритиш ҳақида”ги қонун ҳам кўриб чиқилган.
Таъкидланганидек, Маъмурий жавобгарлик тўғрисидаги кодекснинг тегишли моддасида ички ишлар органлари ва Миллий гвардия билан бир қаторда Давлат хавфсизлик хизматининг ҳам ҳуқуқбузарликни содир этиш сабаблари ҳамда шарт-шароитларини бартараф этиш юзасидан ёзма тақдимномаларини бажариш чораларини кўрмаганлиги учун жавобгарлик белгиланмоқда.
Шунингдек, қонундаги ўзгаришга мувофиқ чет эл фуқароси ёки фуқаролиги бўлмаган шахснинг Ўзбекистонда бўлиш қоидалари ёки муддатларини бузиши билан боғлиқ маъмурий ҳуқуқбузарликларни кўриб чиқиш, шахсни маъмурий йўл билан ушлаб туриш ҳамда транспорт воситаларини ушлаб туриш ва кўрикдан ўтказиш ваколати ички ишлар органлари билан бир қаторда Давлат хавфсизлик хизмати Чегара қўшинларига ҳам берилмоқда.
Изоҳ (0)