1990 йилларнинг энг машҳур моделларидан бири бўлган Линда Евангелиста Тhе Wаll Street Journal нашрига берган интервьюсида унга сўнгги беш йил ичида икки марта кўкрак бези саратони ташхиси қўйилгани ҳақида гапириб берди.
У касаллиги ҳақида биринчи марта 2018 йилда, маммография текширувидан ўтганидан кейин билиб олган.
“Натижалар унчалик яхши эмас эди, шунинг учун соғлиғимдаги бошқа муаммоларни ҳисобга олиб, мен бу ишни иккиланмасдан қилишга қарор қилдим”, — дейди Евангелиста.
Операциядан сўнг модель аҳволи яхшиланганига ва ҳаётга тайёр эканига ишонган, бироқ 2022 йилнинг июль ойида унга яна кўкрак саратони ташхиси қўйилган.
“Нима қилсангиз қилинг, гўзаллигимни йўқоцам ҳам, майли, мен саратондан ўлишни истамайман”, — дея қўшимча қилади модель.
Яқинда операция, кимётерапия ва радиация терапияси курсларидан сўнг Евангелистанинг онкологи унинг соғлиғи ҳақидаги прогнозларини эълон қилди ва моделнинг аҳволи қониқарли эканлигини айтди, шу билан бирга, у саратоннинг қайталаниш эҳтимолини кўрсатадиган онкотайп тестидан “даҳшатли” натижаларга эгалигини таъкидлаган. Модель ўзини “кутиш режимида омон қолган инсон” деб атайди.
“Бир оёғим гўрда эканлигини биламан, аммо ҳозир бутунлай бошқа режимга ўтдим. Соғлиғим билан боғлиқ жиддий муаммоларни бошдан кечирдим. Бироқ тириклигимдан жуда хурсандман. Ҳозир қолган ҳамма нарса — бонусдир”, — дейди Евангелиста.
Моделнинг муваффақиятсиз косметик муолажаси
Беш йил давомида оммага кўриниш бермаган Линда Евангелиста 2022 йилнинг февраль ойида узоқ муддат давом этган депрессия ва 2015 йилнинг августи ҳамда 2016 йилнинг февралида ияк соҳасидаги ёғларни музлатиш бўйича ўтказилган косметик муолажадан кейин кўчага чиқа олмай қолгани ҳақида гапирган эди.
Моделнинг сўзларига кўра, 2016 йил июнь ойида шифокор унга ортиқча ёғ пайдо бўлишига олиб келадиган парадоксал ёғ гиперплазияси ташхисини қўйган. Бу беморларнинг 1 фоизидан камига таъсир қиладиган кам учрайдиган ножўя таъсир ҳисобланади. Ҳатто ёғни олиб ташлаш бўйича иккита операция ҳам Евангелистага ёрдам бермаган, у яна қайталанган.
Изоҳ (0)