Ўгай отаси туфайли уйдан қочиб кетган, Наталья Варлейга кундош бўлишни хоҳламаган, Марфа Василевна роли билан машҳур бўлган актриса — Нина Маслованинг тақдири қандай кечди?

Ёрқин актриса элликдан ортиқ фильм ва телекўрсатувларда ўйнаган. Нина Масловани эпизодлар маликаси деб аташлари бежиз эмас. Кўпинча томошабинлар актрисани бетакрор Марфа Василевна роли орқали танишади.

• Нина Константиновна Маслова 1946 йил 27 ноябрда Рига шаҳрида туғилган. Отаси оиласини ташлаб кетганида қизча 5 ёшда эди.
• Онаси ва ўгай отаси билан келишмовчиликлар туфайли кичкина Нина тез-тез уйдан қочиб, дўстлари ва қариндошлариникида тунаб юради. Оилада у ўзини кераксиз ҳис қила бошлайди. Мактаб ёшида эса қиз кўчадаги йигитлар билан кўп вақт ўтказади. Айнан улар қизни гиёҳвандликка ўргатадилар.
• 1964 йилда Нина мактабни тугатгач, ирригация институтига муҳандислик йўналишига ўқишга киради. Аммо бу касб унинг учун эмаслигини тезда англаб, университетни ташлаб кетади.

• Бир йил ўтгач, Нина Москва бадиий театр мактабининг талабаси бўлади. Бироқ маълум бир турмуш тарзига ўрганиб қолган қиз ўз одатларидан воз кечиши қийин эди. 2 йилдан кейин у ёмон хулқ-атвори учун ўқишдан ҳайдалади.
• Аммо шундан кейин ҳам у актриса бўлиш орзусидан воз кечмайди. Натижада ВГИКга ўқишга киради ва уни муваффақиятли якунлайди. 1971 йилдан бошлаб у Киноактёрлар театр-студияси труппасида ишлай бошлайди.
• Нина Маслованинг биринчи эри болгар эди, улар ВГИКда талаба бўлганида танишган. Аввалига жуфтлик Болгарияда яшашга қарор қилади. Аммо Нина турмуш ўртоғининг ватанига келганида, у ўзига бошқа аёл топиб олгани маълум бўлади.
• Талабалик йилларидаёқ Нина фильмларда рол ўйнай бошлайди. У “Омад тилаймиз” номли янги қисқа метражли фильмида, кейинчалик “Қотилликда айбланмоқда” драмасида ҳам иштирок этади. Ўша пайтда ўқитувчиси Сергей Герасимов талабасини “Кўл бўйида” фильмидаги эпизодик ролга чақиради.

• 1971 йилда Маслова ва Владимир Тихонов ўртасида муносабатлар бошланади. Нина ҳатто Владимирнинг жаҳлдор онаси Нонна Мордюкова билан ҳам тил топишади. Аммо кейин актёрнинг ҳомиладор хотини — Наталя Варлей (“Кавказ асираси” фильмидаги Нина) унинг олдига келади. Актриса ҳайратда қолади, чунки актёр хотини борлиги ҳақида ҳеч нарса демаганди. 

  “Албатта, ўшанда у билан муносабатларимни давом эттиришим мумкин эди. Аммо болани отасидан маҳрум қилиш мен томонимдан пасткашлик бўлади деб ўйладим”, — деб эслайди актриса.

• Маслова Тихонов билан муносабатларни узганида ҳам Нонна Мордюкова у билан яқин бўлиб қолади. Нонна ҳатто бу ҳақда шундай дейди:

  “Ниночка менинг келиним бўлмагани жуда ачинарли. У Володяга яхши хотин бўларди!”

• Ҳақиқий шон-шуҳрат актрисага 26 ёшида “Катта танаффус” фильмининг премьерасидан кейин келади. Фильмда уйда ишёқмас, мактабда эса ҳамма нарсани биладиган гўзал Вика Коровянская ролини ўйнайди.
• Фильмни суратга олиш жараёнида Нина иккинчи марта турмушга чиқади. Уларни Нонна Мордюкова таништириб қўйганди. Аммо бу никоҳ 6 ойга ҳам бормайди. Актриса эрининг қўпол табиатига чидай олмайди.
• Маслова соғлиғи туфайли фарзанд кўра олмасди. Бундан ташқари, у шахсий ҳаётидаги муваффақиятсизликларини онасининг кучли таъсири билан боғлайди.

  “Мен ҳаётимдаги воқеаларни қайта-қайта такрорлайман, нега ҳаммаси шундай, нега бошқача эмас. Сўнгги икки йил ичида онамга бутунлай боғланиб қолганимни англадим, мен доимо онамнинг занжирида эдим”, деб тан олади у.

• Карьерасининг чўққиси 1973 йилда, таниқли режиссёр Леонид Гайдай уни “Иван Василевич касбини ўзгартиради” комедиясида рол ўйнашга таклиф қилганида келади. Актриса фильмда ҳақиқий тарихий шахс — шоҳ Иван Грознийнинг хотини Марфа Василевна Собакинани ўйнайди.
• Икки йил ўтгач Нина “Табассум қил, тенгдош” мусиқий комедиясида иштирок этади. У бир вақтнинг ўзида иккита асосий — бир-бирига икки томчи сув каби ўхшаш қизлар Маша ва Мария ролларини ўйнайди.

• 1975 йилда эса Нина Георгий Данелий томонидан суратга олинган “Афоня” трагикомедиясида ўйнаб, миллионлаб томошабинларнинг севимлисига айланади. Унинг қаҳрамони сантехник Афонянинг мижози Елена Орлова шу қадар мафтункор эдики, у бахтсиз дангасани оилавий ҳаётга қайтаради. Нинанинг фильмдаги партнёри Леонид Куравлёв эди.
• Айтганча, 10 йил ўтгач, бу икки актёр яна суратга олиш майдончасида учрашади. Бу сафар Леонид Гайдайнинг “Ҳаёт учун хавфли” комедиясида. Маслова бу сафар эпизодда ўйноқи итнинг эгаси ролини ўйнайди.

• 1970 йилларнинг охири ва 80 йиллардаги фильмларда бир нечта кичик роллардан сўнг, Нина фильм ва телевидениедаги ролларга камроқ таклиф қилинади. Молиявий муаммолар, шахсий ҳаётдаги қийинчиликлар, соғлиғида жиддий муаммолар бошланади. Шифокорлар ҳатто унинг даволаб бўлмайдиган касаллиги борлигини ва узоқ умр кўролмаслигини айтишади. Ўшанда актриса эндигина 50 ёшда эди. Бироқ бир мунча вақт ўтгач, актриса зарарли одатлардан воз кечиб, соғлиғини тиклашга муваффақ бўлади.

• Айни пайтда Нина Маслованинг экрандаги сўнгги роли 2017 йилда суратга олинган “Қизлар базми” телесериалидаги заргарлик дўконининг сотувчиси. Премьера вақтида актриса 71 ёшда эди.

• Бугунги кунда юлдуз фильмларда рол ўйнамайди, лекин у бажонидил интервью беради, шахсий ҳаётидаги хотиралари ва ҳикоялари билан ўртоқлашадиган дастурлар ва ток-шоуларда қатнашади.
• Нина Константиновнанинг тан олишича, томошабинлар уни ёрқин эпизодик роллари туфайли ҳали ҳам эслашади, ҳозиргача уни кўчада ва дўконларда танийдилар. Айниқса, одамлар уни бетакрор Марфа Василевна роли билан ёдга олишади.