Ҳашаматли автомобиллар, шахсий самолётлар, яхталар, ороллар... Банк ҳисобварағида юз миллион доллардан ортиқ маблағ бўлса, ҳатто энг кулгили “истаклар рўйхати” ҳам дарҳол ҳақиқатга айланиши мумкин.
Ким Кардашян ва Ye — 750 минг долларлик тилла унитаз
Ким Кардашян Канье Уэст билан турмуш қуриш арафасида Лос-Анжелеснинг нуфузли ҳудудидан Bel Air деб номланган уй сотиб олади. Версалга бўлган ташрифидан илҳомланиб, собиқ турмуш ўртоқлар бинони Ўрта Ер денгизи услубида жиҳозлаш учун бир неча миллион доллар сарфлайди. Американинг TMZ таблоидига кўра, мазкур уйда боулинг, очиқ ва ёпиқ бассейнлар, баскетбол майдони, кинотеатр ва спорт зали жойлашган. Ким ва Канье хоналарни жиҳозлашга пул аяшмайди: Сваровски тошлари билан безатилган музлаткич ошхонани безаб туради. Хабарларга кўра, эр-хотин Людовик XIV услубидаги олтиндан ясалган тўртта унитазга 750 минг доллар сарфлаган. Кейинчалик бу уй асл нархидан икки баравар қимматга сотилади.
Дрейк — 395 минг долларлик от ёлидан тайёрланган матрас
Дизайнер Феррис Рафаули бошчилигида Швециянинг Hästens фирмаси томонидан Дрейк учун махсус матрас тайёрланган. Ушбу компаниянинг матраслари 50-100 йил фойдаланишга мўлжалланган ва табиий материаллардан, жумладан, от ёлидан тайёрланади.
“Ётоқхона мен тун охирида ташқи дунёдан дам олиш учун борадиган ва келгуси кундан завқ олиш учун кўзларимни очадиган жой. Ётоғимда ўзимни сувда сузаётгандек ҳис қиламан”, — дейди Дрейк Architectural Digest интерьер журналига берган интервьюсида.
Перис Хилтон — итлари учун 325 минг долларлик уйча
Перис Хилтон ўзининг тўрт оёқли дўстларини яхши кўриши билан машҳур бўлиб, улар билан тез-тез омма олдида пайдо бўлади. Юлдуз итлари учун вилласининг мини-версиясини қуриб берган. Майдони 28 квадрат метр бўлган бу уйча Лос-Анжелесдаги Хилтонлар уйининг орқа ҳовлисида жойлашган.
“Итларим кондиционер, иситиш тизими, дизайнерлик мебеллари ва қандил ўрнатилган икки қаватли уйда яшайди”, — деб ёзади юлдуз ижтимоий тармоқларда.
Пушти деворли, италянча услубдаги уйда французча балкон, бассейн ва майсазор ҳам мавжуд.
Бейонсе ва Жей Зи — 80 минг долларлик Барби
Бейонсе ва Жей Зи бир яшар қизи Барби қўғирчоғини истаётганини билгач, қизалоқнинг хоҳишини бажаришга шошилади. Аммо улар энг яқин ўйинчоқлар дўконига бориш ўрнига, 80 минг долларга қўғирчоқ буюртма қилишади. Бундай юқори нарх Барби либосидаги 160 та олмос, оқ олтиндан ясалган тақинчоқлари билан боғлиқ. Совға қизалоқнинг туғилган кунида тақдим этилган бўлиб, байрам кечасининг нархи 200 минг долларни ташкил этган, бу қўғирчоқдан деярли икки баравар қиммат.
Леди Гага — шарпаларни аниқлайдиган 50 000 долларлик детектор
Леди Гаганинг ғайриоддий фобиялари бор, жумладан, кичик болалар, телефон қўнғироқлари ва арвоҳлардан қўрқиш. Агар болалар олдига бормаслик ва телефонни кўтармасликнинг иложи бўлса, арвоҳлардан яширинишнинг имкони йўқ. Кечаси тинч ухлаш учун Гага электромагнит майдондаги тебранишларга жавоб берадиган махсус сенсор сотиб олган — худди “Шарпа овчилари” фильмидаги каби. Бу қурилмадан юлдузнинг квартиралари ва концерт залларида паранормал фаолият мавжудлигини текширишда фойдаланилади. Ушбу детектор учун Леди Гага тахминан 50 минг доллар сарфлаган.
Виктория Бекхем — 33 минг долларлик тилла iPhone
Виктория Бекхем мавқейига мос келадиган телефон сотиб олмоқчи бўлганида таниқли мобил қурилмалар декоратори — Стюарт Хюз шу иш билан шуғулланган. Қимматбаҳо iPhone 4 корпуси 150 грамм 24 каратли сариқ олтиндан ясалган ва олмос билан безатилган. Apple ҳар йили янги телефон моделларини чиқаришини ҳисобга олсак, бундай харидни оқилона деб бўлмайди.
Изоҳ (0)