ДХХнинг Сурхондарё вилояти бўйича бошқармаси ходимлари ва Чегара қўшинлари ҳарбий хизматчилари томонидан олиб борилган тезкор-қидирув тадбирлари натижасида, қўшни давлат ҳудудидан контрабанда йўли билан олиб ўтилган катта миқдордаги наркотик модда топилди.
Қайд этилишича, Музработ туманининг чегара ҳудудидан ўтувчи Амударё қирғоғидаги қамишлар орасига номаълум шахслар томонидан яшириб кетилган 1 дона полиэтилен қоп топилиб, холислар иштирокида кўздан кечирилганда унинг ичида 10 дона ўрамда гиёҳвандлик воситаси борлиги аниқланган.
Экспертиза хулосасига кўра, ушбу ўрамларда соф вазни 10 килограмм 38 грамм бўлган опий моддаси борлиги маълум бўлган.
Ҳозирда ҳолат юзасидан ДХХ Сурхондарё вилояти бўйича бошқармаси Тергов бўлими томонидан Жиноят кодексининг 246-моддаси (контрабанда) 2-қисми билан жиноят иши қўзғатилиб, ушбу наркотик модда эгаларининг шахсига аниқлик киритиш бўйича зарур чора-тадбирлар амалга оширилмоқда.
Шунингдек, Давлат хавфсизлик хизматининг Қашқадарё вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда эса Сурхондарё—Тошкент йўналишида ҳаракатланаётган Nexia русумли автомашина Кўкдала туманида жойлашган “Умакай” ЙПХ масканида тўхтатилган.
Денов туманида яшовчи 30 ёшли фуқаро бошқарувида бўлган ушбу автотранспорт воситаси кўздан кечирилганда, унинг салон қисмига яшириб қўйилган 935 грамм опий ва 200 грамм гашиш моддалари борлиги аниқланиб, процессуал тартибда расмийлаштириб олинган.
Ҳозирда мазкур шахсга нисбатан ДХХ Қашқадарё вилояти бўйича бошқармаси Тергов бўлими томонидан жиноят иши қўзғатилиб, тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)