ДХХ Самарқанд вилоятида гиёҳванд моддалар олди-сотдиси билан шуғулланиб келган гуруҳни қўлга олди. Бу ҳақда вилоят ИИБ ахборот хизмати хабар берди.
Маълум қилинишича, ДХХнинг Самарқанд вилояти бўйича бошқармаси ходимлари томонидан вилоят ИИБ билан ҳамкорликда тезкор тадбир ўтказилган. Тадбирда Ургут туманида яшовчи 1978 ва 1986 йилларда туғилган опа-сингил 911 грамм опий гиёҳвандлик моддасини 12 минг АҚШ долларига сотган вақтида ушланган.
Тезкор суриштирув ҳаракатлари давомида улар ушбу гиёҳвандлик моддасини мазкур туманда истиқомат қилувчи 33 ёшли икки нафар шахсдан олгани аниқланиб, улар ҳам қўлга олинган.
Шунингдек, ушбу шахсларнинг яшаш хонадонларида ўтказилган тинтув-тергов ҳаракатлари давомида улардан бирининг уйидан келгусида сотиш мақсадида сақлаб келинаётган 228 грамм, иккинчисидан эса 7 килограмм 187 грамм опий моддаси холислар иштирокида расмийлаштириб олинган.
Аниқланишича, тезкор тадбир давомида олинган жами 8 килограмм 326 грамм опий моддаси мамлакатга Тожикистондан контрабанда йўли билан олиб келинган.
Ҳозирда қўлга олинган тўрт нафар фуқарога нисбатан Жиноят кодексининг 246- (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) билан жиноят иши қўзғатилган.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)