Тошкент шаҳар ИИББ Йўл ҳаракати хавфсизлиги бошқармаси шахсий таркиби томонидан 1—10 август кунлари давомида жами 16 449 та қоидабузарик аниқланди. Бу ҳақда пойтахт ИИББ ахборот хизмати хабар берди.
Қайд этилишича, аниқланган ҳолатларнинг 5 888 таси қўпол қоидабузарликлардир. Жумладан:
- транспорт воситаларини маст ҳолда бошқариш — 91 та;
- транспорт воситаларини тегишли ҳужжатларсиз бошқариш — 714 та;
- транспорт воситасини бошқариш вақтида ҳайдовчиларнинг телефондан фойдаланиши — 379 та;
- светофор талабларига риоя қилмаслик — 213 та;
- одам ташиш қоидасини бузиш — 511 та;
- қувиб ўтиш қоидасини бузиш — 197 та;
- авария ҳолатини юзага келтириш — 34 та;
- ИИОлари ходимининг қонуний талабларини бажармаслик — 50 та.
Шу билан бирга, 3 599 нафар қоидабузар пиёдага нисбатан маъмурий баённома расмийлаштирилган. Мазкур давр давомида 35 та йўл-транспорт ҳодисаси қайд этилган бўлиб, шундан 28 таси пиёдалар билан боғлиқ.
Шунингдек, Тошкент шаҳар ИИББ ҳамда ЙҲХБ ходимлари томонидан 22 та гиёҳвандлик воситалари, 198 та совуқ қурол ва 3 та пневматик қурол билан боғлиқ ноқонуний ҳаракатларга чек қўйилган.
Пиёдалар билан боғлиқ ЙТҲлар
Июль охирларида Тошкентнинг Яккасарой туманида йўлнинг белгиланмаган қисмидан кесиб ўтаётган пиёда автобус уриб юборишидан вафот этганди. Шунингдек, Олий Мажлис Қонунчилик палатаси биноси ёнидаги тартибга солинмаган пиёдалар ўтиш йўлида йўл-транспорт ҳодисаси содир бўлган эди. Damas автомашинаси тартибга солинмаган пиёдалар ўтиш жойида йўлни кесиб ўтаётган пиёдани уриб юборган. ЙТҲ натижасида тан жароҳат олиб шифохонага ётқизилганлар ҳақида маълумот келиб тушмаган.
Июнь ойида бўлса Тошкент вилояти Қибрай туманида маст ҳайдовчи “ВАЗ-2106” (“Жигули”) билан уч нафар болани уриб юборган ва жабрланувчилардан бири вафот этганди.
Изоҳ (0)