DXXning Surxondaryo viloyati bo‘yicha boshqarmasi xodimlari va Chegara qo‘shinlari harbiy xizmatchilari tomonidan olib borilgan tezkor-qidiruv tadbirlari natijasida, qo‘shni davlat hududidan kontrabanda yo‘li bilan olib o‘tilgan katta miqdordagi narkotik modda topildi.
Qayd etilishicha, Muzrabot tumanining chegara hududidan o‘tuvchi Amudaryo qirg‘og‘idagi qamishlar orasiga nomaʼlum shaxslar tomonidan yashirib ketilgan 1 dona polietilen qop topilib, xolislar ishtirokida ko‘zdan kechirilganda uning ichida 10 dona o‘ramda giyohvandlik vositasi borligi aniqlangan.
Ekspertiza xulosasiga ko‘ra, ushbu o‘ramlarda sof vazni 10 kilogramm 38 gramm bo‘lgan opiy moddasi borligi maʼlum bo‘lgan.
Hozirda holat yuzasidan DXX Surxondaryo viloyati bo‘yicha boshqarmasi Tergov bo‘limi tomonidan Jinoyat kodeksining 246-moddasi (kontrabanda) 2-qismi bilan jinoyat ishi qo‘zg‘atilib, ushbu narkotik modda egalarining shaxsiga aniqlik kiritish bo‘yicha zarur chora-tadbirlar amalga oshirilmoqda.
Shuningdek, Davlat xavfsizlik xizmatining Qashqadaryo viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda o‘tkazilgan tezkor tadbirda esa Surxondaryo—Toshkent yo‘nalishida harakatlanayotgan Nexia rusumli avtomashina Ko‘kdala tumanida joylashgan “Umakay” YPX maskanida to‘xtatilgan.
Denov tumanida yashovchi 30 yoshli fuqaro boshqaruvida bo‘lgan ushbu avtotransport vositasi ko‘zdan kechirilganda, uning salon qismiga yashirib qo‘yilgan 935 gramm opiy va 200 gramm gashish moddalari borligi aniqlanib, protsessual tartibda rasmiylashtirib olingan.
Hozirda mazkur shaxsga nisbatan DXX Qashqadaryo viloyati bo‘yicha boshqarmasi Tergov bo‘limi tomonidan jinoyat ishi qo‘zg‘atilib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)