Қирғизистон Маданият вазирлиги олти ой давомида республиканинг еттита телеканалида режалаштирилган текширув ўтказди. Бу ҳақда вазирлик матбуот химзати хабар берди.
Текширув давомида иккита — “312 КИНО” ва “312 TV” телеканаллари Қирғизистон Республикасининг “Телевидение ва радиоэшиттириш тўғрисида”ги қонунига риоя қилмагани аниқланди. Қонунга кўра, телекўрсатувларнинг камида 60 фоизи, жумладан, соат 07:00 дан 10:00 гача ва 18:00 дан 23:00 гача эфирга узатиладиган дастурлар давлат тилида бўлиши шарт.
Қайд этилишича, мазкур телеканалларнинг ҳар бири 23 минг сом (2,87 миллион сўм) миқдорида жаримага тортилган.
Қирғиз тили тўғрисидаги қонун
Қирғизистон президенти Садир Жапаров 17 июль куни “Қирғизистон Республикасининг давлат тили тўғрисида”ги конституциявий қонунни имзолаган эди. Унда давлат хизматчилари ва яна қатор соҳа вакиллари учун қирғиз тилини билиш мажбурий этиб қўйилган. Шунингдек, телерадиокомпаниялар, шу жумладан, хусусий компаниялар ўз кўрсатувларининг камида 60 фоизини қирғиз тилида кўрсатиши шарт, деб белгиланган.
Маълумот ўрнида, Қирғизистонда рус тили расмий тил сифатида қўлланади. Россия ташқи ишлар вазири Сергей Лавров янги қонунни “демократияга зид” деб атади.
Садир Жапаров эса “Давлат тили тўғрисида”ги қонунда рус тилига нисбатан дискриминация йўқлигини тушунтирди.
Изоҳ (0)