Қирғизистон Давлат тили миллий комиссияси раиси Қанибек Осмоналиев давлат ва муниципал хизматчилар қирғиз тилини билишини тасдиқлай олмаса, янги қонунга биноан ишдан бўшатилишини айтди.
Қанибек Осмоналиевнинг таъкидлашича, янги қонундаги қирғиз тилини билиши шарт бўлган касб эгалари рўйхатини ўз ичига олган модда атрофида баҳс кетмоқда. Чунки улар орасида шифокорлар ва ўқитувчилар бор, лекин улар давлат хизматчилари ҳисобланмайди.
Қирғизистон президенти Садир Жапаров 17 июль куни “Қирғизистон Республикасининг давлат тили тўғрисида”ги конституциявий қонунни имзолаган эди. Унда давлат хизматчилари ва яна қатор соҳа вакиллари учун қирғиз тилини билиш мажбурий этиб қўйилган.
Россия ташқи ишлар вазири Сергей Лавров ушбу қонунни “демократияга зид”, деб атади.
Осмоналиевнинг сўзларига кўра, “Давлат тили тўғрисида”ги қонун Қирғизистонда рус тилининг ўрни ва мақомига путур етказмайди.
“Рус тилига бизчалик бағрикенг бўлган бирорта давлатни билмайман. Рус тилига ҳурмат ва демократик муносабатда ҳатто Беларусь биздан ортда қолмоқда. Ваҳоланки, улар славян миллатига мансуб. Россия расмийлари Қирғизистонда тил ўзгартирилаётганини айтишмоқда. Қонуннинг 2-моддасига қаранг, унда рус тили расмий тил сифатида қўлланиши аниқ қилиб айтилган. Ёки бу ҳақда 100 марта ёзишимиз керакми? Худди шу қоида Қирғизистон Республикаси Конституциясида ҳам мавжуд. Бошқа ҳеч қайси республикада бундай эмас. Қирғизистон тиллардан эркин фойдаланиш тамойилига амал қилади. Ҳар бир фуқаро ўз она тилини ривожлантириш учун шароит яратишга ҳақли”, — деди Осмоналиев.
Аввалроқ Садир Жапаров ҳам “Давлат тили тўғрисида”ги қонунда рус тилига нисбатан дискриминация йўқлигини тушунтирганди.
Изоҳ (0)